एजेन्सी – म्यानचेस्टर सिटीका प्रशिक्षक पेप ग्वार्डिओलाले बेलायतका धेरै जनताले लिभरपुलले प्रिमियर लिग उपाधि जितेको हेर्न चाहेको दाबी गरेका छन् ।

काटालान प्रशिक्षक ग्वार्डिओलाको सिटीले आइतबार न्युक्यासललाई ५–० ले हराउँदै लिभरपुलभन्दा ३ अंक बढी जोडेको छ । जसका कारण प्रिमियर लिगको दोस्रो स्थानमा रहेको लिभरपुलमाथि दबाब बढेको छ ।

‘यो देशका धेरै मान्छेले लिभरपुललाई समर्थन गर्छन । सञ्चारमाध्यम र सबैले,’ ग्वार्डिओलाले भनेका छन्,‘ युरोपियन प्रतियोगितामा लिभरपुलको सफल इतिहासका कारण पनि सबैले टोली सफल भएको हेर्न चाहेका छन् । तर पछिल्लो ३० वर्षमा उनीहरुले मात्र एकपटक लिग उपाधि जितेका छन् । त्यसले हामीलाई फरक पार्दैन ।’

लिभरपुलले सफलता प्राप्त गरोस् भन्ने चाहनाले आफूलाई भने फरक नपर्ने ग्वार्डिओलाले बताएका छन् । ‘त्यसले हामीलाई फरक पर्दैन’, उनले भनेका छन्,‘ हाम्रो भन्दा लिभरपुलका समर्थक विश्वमा र इंग्ल्यान्डमा धेरै छन् ।’

सिटीको लक्ष्य

सिटीले प्रिमियर लिग जित्नका लागि आफ्नो टोलीले के गर्नुपर्छ भन्नेमा पनि ग्वार्डिओलाले बताएका छन् । ‘हामीलाई ९ अंक अथवा अहिलेको अवस्थामा ६ अंक आवश्यक छ । आउने दुई खेलमा के हुन्छ र गोलअन्तर कस्तो हुन्छ त्यसमा उपाधि भर पर्दछ’, उनले भनेका छन्,‘ वल्भ्सविरुद्ध बुधबार हुने खेल हाम्रा लागि फाइनल सरह हुनेछ ।’

उनले थपे, ‘हामी त्यो खेल जित्नका लागि प्रयास गर्नेछौं । हाम्रो सफलता हाम्रै हातमा छ र त्यो महत्वपूर्ण हुनेछ । हामी सकारात्मक छौं । एक अंक वा ३ अंक जोड्दा पनि परिस्थिति फरक छैन । हामीले अघि बढ्नुछ ।’