काठमाडौं (हाम्रो खेलकुद) – गण्डकी प्रदेश फुटबल संघले अखिल नेपाल फुटबल संघ (एन्फा) को आसन्न निर्वाचनका लागि प्रदेशबाट मताधिकार प्राप्त गर्ने ६ जिल्लाको टुंगो लगाएको छ ।

संघको शुक्रबार बसेको बैठकले प्रदेशका ८ जिल्ला फुटबल संघ मध्येबाट ६ जिल्लालाई मताधिकारको टुंगाो लगाएको हो । तनहुँ, स्याङ्जा, लमजुङ, मनाङ, नवलपुर र बागलुङलाई मताधिकार प्राप्त गर्दा कास्की र गोरखा मताधिकारबाट वञ्चित हुने भएका छन् ।

दुवै जिल्लाको नवनिर्वाचित कमिटिमा एन्फाको संस्थापन पक्षसँग असन्तुष्ट पदाधिकारी नेतृत्वमा आएका थिए । संस्थापन पक्षको पकड रहेको मानिएको गण्डकी प्रदेशमा अन्य ६ जिल्ला केन्द्रिय निर्वाचनका लागि प्रतिनिधि छनोट गरिएको बुझिएको छ ।

एन्फाले बैशाख २४ गतेभित्र प्रतिनिधित्व गर्ने ६ जिल्लाको नाम पठाउन निर्देशन दिएको थियो । एन्फाको केन्द्रिय निर्वाचन असार ६ गते हुँदैछ । जसमा एन्फाका ४८ जिल्ला मध्ये ४५ जिल्लाले मताधिकारसहित केन्द्रिय निर्वाचनमा भाग लिनेछन् । यस्तै ए, बी र सी डिभिजन क्लब, प्रशिक्षक संघ, रेफ्री, खेलाडी र महिला समितिले पनि मताधिकारसहित भाग लिनेछन् ।

यस्तै प्रदेश फुटबल संक प्रदेश १ को बैठकले आसन्न निर्वाचनमा आगामी कार्यकालका लागि प्रदेश १ बाट अध्यक्षमा उमेदवारी दिने उमेदवारको पक्षमा सर्वसम्मत रुपले एक जुट भई सामुहिक मतदान गर्ने निर्णय गरेको छ । जसमा ११ जिल्ला फुटबल संघका अध्यक्ष, महासचिव र सदस्यले हस्ताक्षर गरेका छन् ।