एजेन्सी – स्पेनिस ला लिगाको शीर्ष चारको दौडमा रहेको एट्लेटिको म्याड्रिड पराजित भएको छ । एट्लेटिको घरेलु टोली एथलेटिको विल्वाओसँग २–० ले पराजित भएको हो ।

सान मेमेसमा शनिबार राति भएको खेलमा विल्वाओको जितमा इनाकी विलियम्सले गोल गर्दा एक गोल उपहार पाएको थियो । आठौं मिनेटमा मारियो हर्माेसोको आत्मघाती गोलबाट अग्रता लिएको विल्वाओले ५६औं मिनेटमा इनाकी विलियम्सको पेनाल्टी गोलबाट जित पक्का गर्यो ।

घरेलु टोलीविरुद्ध बल पोसेसन राख्दै दवाव बढाएपनि एट्लेटिकोले विल्वाओको बलियो रक्षापङ्ति तोड्न नसक्दा पराजित हुन पुग्यो । यो हारसँगै एट्लेटिको म्याड्रिड ३४ खेलबाट ६१ अंक जोडेर चौथो स्थानमा रहँदा दोस्रो स्थानको सेभियासँग अंक बराबरी गर्नबाट चुकेको छ ।

दोेस्रो स्थानको सेभियाको ६४ तथा एक खेल कम खेलेको बार्सिलोनाको ६३ अंक छ । एट्लेटिकोलाई हराएको विल्वाओ ५१ अंक जोडेर आठौं स्थानमा रहेको छ ।

शनिबार राति नै स्पान्योलमाथि ४–० को फराकिलो जित निकाल्दै रियल म्याड्रिड यो सिजनको ला लिगाको च्याम्पियन बनेको छ । रियलले कीर्तिमानी ३५औं पटक ला लिगा जित्न सफल भएको हो । स्पान्योलविरुद्धको जितमा रोड्रिगोले दुई तथा मार्काे एसेन्सियो र करिम बेन्जेमाले समान एक गोल गरे ।

यो जितसँगै शीर्षस्थानमा रहेको रियलको ३४ खेलबाट १ अंक पुगेको छ । रियलले सेभियालाई १७ तथा बार्सिलोनालाई १८ अंकले पछि पारेको छ । पराजित स्पान्योल ३९ अंक जोडेर १३औं स्थानमा रहेको छ ।

यस्तै अर्काे खेलमा भ्यालेन्सिया र लेभान्टेले १–१ गोलको बराबरी खेल्दै अंक बाँडेका छन् । १० खेलाडीमा समेटिएको भ्यालेन्सियाका ह्युगो डुरोले गोल गर्दा लेभान्टेका ओस्कार डुआर्टीले बराबरी गोल फर्काए ।

बराबरीपछि भ्यालेन्सिया ३४ खेलबाट ४३ अंक जोडेर १०औं स्थानमा रहँदा लेभान्टे २६ अंक जोडेर पुछारमा रहेको छ ।