काठमाडौं (हाम्रो खेलकुद) – अखिल नेपाल फुटबल संघ (एन्फा) को दुई महिनापछि हुने निर्वाचनका लागि ‘बी’ डिभिजनबाट प्रतिनिधि छनोट भएका छन् । सातदोबाटोस्थित एन्फा मुख्यालयमा शुक्रबार भएको निर्वाचनमार्फत ११ क्लबले आसन्न निर्वाचनका लागि मताधिकार प्राप्त गरेका हुन् ।

प्रतिनिधि छनोटमा बी डिभिजनका १४ क्लब सहभागी थिए । चर्च ब्वाइज युनाइटेड, खुमलटार युथ क्लब, रानी पोखरी कर्नर टिम (आरसिटी), सरस्वती युथ क्लब, श्री भगवती, मध्यपुर युथ क्लब, टुसाल युथ, नयाँबस्ती, बाँसबारी, श्री कुमारी र ब्वाईज युनियनले मताधिकार पाउँदा रेलिगेसनमा परेको सामाजिक युथ र झम्सिखेलसँगै वीरगञ्ज युनाइटेडले मताधिकार प्राप्त गर्न सकेनन् ।

निर्वाचनमा खुमलटारले सर्वाधिक १४ मत प्राप्त गर्यो । श्री भगवतीले १३, आरसीटी, मध्यपुर, टुसाल, नयाँ बस्ती, सरस्वती, श्रीकुमारी र ब्वाइज युनियनले समान १० मत प्राप्त गरे । यस्तै बाँसबारीले ७, चर्च ब्वाइले ६ मत प्राप्त गर्दा सामाजिकले ४, झम्सिखेलले ५ र विरगञ्जले २ मत प्राप्त पाए ।

शुक्रबारै ‘सी’ डिभिजनको प्रतिनिधि छनोटबाट ९ क्लबले मताधिकार लिएका छन् । मनोहरा एकिकृत युवा क्लबले सर्वाधिक १४ मत प्राप्त गरेको थियो । वीरगन्ज युथ क्लब, प्लानिङ व्वाइज युनाइटेड, महावीर स्टडिज एन्ड एसोसिएसन, आर.सी ३२ फुटबल एकेडेमीले समान ९ मत प्राप्त गरेका थिए । खालीबारी युवा क्लब, पुल्चोक स्पोर्टस् क्लब र स्वयम्भु क्लबले समान ८ मत प्राप्त गरे ।

गोलाप्रथामा सामाजिक कल्याण खेलकुद केन्द्रले पनि मताधिकार प्राप्त गरेको छ । समाजिक र झापा फुटबल क्लबले समान ७ मत प्राप्त गरेपछि गोलाप्रथा भएको थियो । पराजित स्पोर्टस एकेडेमी साँगा, सानोपा क्लब, रानीवन स्पोर्टस क्लबले समान ६ र ओसिस क्लबले ५ मत प्राप्त गरे । एन्फाको निर्वाचन असार ६ गतेका लागि तय भएको छ ।