चितवन (हाम्रो खेलकुद) – उपाधि दावेदार नेपाल एपिएफ क्लबले राष्ट्रिय महिला लिगको पहिलो राउन्डमा शतप्रतिशत जित निकालेको छ । बुधबार पहिलो चरणको आफ्नो अन्तिम खेलमा एपिएफले विराटनगर महानगरपालिका मोरङलाई २–१ ले पराजित गर्दै पहिलो चरणको सबै सात खेलमा शतप्रतिशत जित निकालेको हो ।

एपिएफको जितमा सावित्रा भण्डारी ‘साम्वा’ र सरु लिम्बुले गोल गरिन् । विराटनगरकी इमा राईले एक गोल फर्काएन् । चितवन भरतपुरस्थित शारदा उच्च माविको खेल मैदानमा भएको खेलको ६५औं मिनेटमा साबित्राको गोलबाट एपिएफले सुरुवाती अग्रता लिन सफल भयो ।

७६औं मिनेटमा सरु लिम्बुले गोल गर्दै एपिएफको अग्रता दोब्बर पारिन् । ७९औं मिनेटमा इमा राईले गोल गर्दै खेललाई २–१ को स्थितिमा ल्याएपनि त्यसपछि थप गोल निस्कन नसक्दा एपिएफ विजयी हुन सफल भयो ।

यो जितसँगै शीर्षस्थानमा रहेको एपिएफले ७ खेलबाट २१ अंक जोडेको छ । पराजित विराटनगर १० अंक जोडेर पाँचौं स्थानमा रहेको छ ।

बुधबारै ललितपुर महानगरपालिका ललितपुर र वालिङ नगरपालिका स्याङ्जाले १–१ गोलको बराबरी खेल्दै अंक बाँडेका छन् । वालिङका लागि हिमा रावतले १४औं मिनेटमा गोल गर्दा ६२औं मिनेटमा सन्जी थिङको आत्मघाती गोलले वालिङ अंक बाड्न बाध्य बन्यो ।

पहिलो चरणको खेल सहिदा पुलिस १५ अंक जोडेर दोस्रो स्थानमा रहेको छ । समान १५ अंक नै रहेपनि आर्मी हेड टु हेडमा पछि छ । १२ अंक जोडेको धनगढी उपमहानगरपालिका चौंथो स्थानमा रहेको छ । समान ४ अंक रहेपनि गोलअन्तरमा ललितपुर छैटौ र चन्द्रपुर नगरपालिका रौतहट सातौ स्थानमा रहेको छ । पहिलो राउन्डको अन्तिम खेलमा १ अंक जोडेको वालिङ पुछारमा रहेको छ ।

दोस्रो चरणको खेलहरु चितवनमै हुने खेल तालिका छिट्टै सार्वजनिक गरिने अखिल नेपाल फुटबल संघ (एन्फा) ले जनाएको छ । यसअघि एन्फाले दोस्रो राउन्डको खेल विराटनगरमा गराउने तयारी गरेको थियो ।