काठमाडौं (हाम्रो खेलकुद) – खुमलटार युथ क्लबले सहिद स्मारक ‘बी’ डिभिजन लिगमा श्री भगवती क्लब टोखालाई पराजित गरेको छ । खुमलटारले ४–२ को जित निकालेको हो ।

सातदोबाटोस्थित एन्फा कम्प्लेक्सको खेल मैदानमा बिहीबार भएको खेलमा खुमलटारको जितमा दिवस छन्त्यालले दुई तथा सुरोज बस्नेत र प्रसन्न श्रेष्ठले समान एक गोल गरे । श्री भगवतीका सन्तोष केसी र राजु गुरुङले गोल फर्काए ।

खेलको २१औं मिनेटमा दिवस छन्त्यालको गोलबाट खुमलटारले सुरुवाती अग्रता लिएको थियो । ३१औं मिनेटमा सन्तोष केसीले गोल गर्दै खेललाई पहिलो हाफमा १–१ गोलको बराबरीमा ल्याए । ५५औं मिनेटमा दिवसले व्यक्तिगत र टोलीका लागि दोस्रो गोल गर्दै खुमलटारलाई २–१ ले अघि बढाए ।

८३औं मिनेटमा सुरोज बस्नेतले गोल गर्दै खेललाई ३–१ को अवस्थामा ल्याए । ८९औं मिनेटमा प्रसन्न श्रेष्ठले गोल गर्दै खुमलटारलाई फराकिलो जिततर्फ अग्रसर गराए । इन्ज्युरी समयको थप गरिएको दोस्रो मिनेटमा राजु गुरुङले गोल गर्दै खेललाई ४–२ को स्थितिमा ल्याएपनि त्यसपछि थप गोल निस्कन नसक्दा खुमलटार विजयी हुन सफल भयो । जितसँगै खुमलटारको १० खेलबाट १५ अंक पुगेको छ । पराजित श्री भगवतीको १० खेलबाट १४ अंक रहेको छ ।

लिगकै अर्काे खेलमा नयाँ वस्ती युथ क्लब र सरस्वती युथ क्लबले गोलरहित बराबरी खेल्दै अंक बाँडेका छन् । बराबरीपछि सरस्वती १० खेलबाट १६ अंक जोडेर दोस्रो स्थानमा उक्लिएको छ । नयाँ वस्तीको १० खेलबाटै १४ अंक जोडेर छैटौं स्थानमा रहेको छ ।

यस्तै लिगकै अर्काे खेलमा ट्ुसाल युथ क्लब र ब्वाइज युनियन क्लबले १–१ गोलको बराबरी खेल्दै अंक बाँडेका छन् । टुसालका लागि आदर्श लिम्बुले गोल गर्दा ब्वाइज युनियनका विनोद राईले बराबरी गोल फर्काए । ४९औं मिनेटमा आदर्श लिम्बुले गोल गर्दै टुसाललाई सुरुवाती अग्रता दिलाए । ५६औं मिनेटमा विनोद राईले गोल गर्दै खेललाई १–१ गोलको बराबरीमा ल्याए । त्यसपछि थप गोल निस्कन नसक्दा खेल बराबरीमा सकियो ।

यो बराबरीसँगै टुसाल १० खेलबाट १३ अंक जोडेर आठौं स्थानमा रहेको छ । समान १३ अंक नै रहेपनि टुसालले श्री कुमारी र मध्यपुरलाई पछि पारेको हो । पराजित ब्वाइज युनियन ९ अंक जोडेर पुछारमा रहेको छ ।