चितवन (हाम्रो खेलकुद) – धनगढी उपमहानगरपालिका, ललितपुर र विभागीय नेपाल पुलिस क्लबले राष्ट्रिय महिला लिगमा विजयी सुरुवात गरेका छन् ।

चितवनमा शुक्रबार भएको खेलमा धनगढीले वालिङ नगरपालिका स्याङ्जालाई ६–० को भारी अन्तरले पराजित गर्दै विजयी सुरुवात गरेको हो । धनगढीको फराकिलो जितमा चन्द्रा बस्नेतले ह्याट्रिकसहित चार गोल गर्दा सीमा रावल र अन्जना थुलुङ राईले समान एक गोल गरिन् ।

खेलको १०औं मिनेटमा सीमाको गोलबाट धनगढीले सुरुवाती अग्रता लिएको थियो । ३०औं मिनेटमा चन्द्राले गोल गर्दै धनगढीको अग्रता दोब्बर पारिन् । ३५औं मिनेटमा चन्द्राले व्यक्तिगत दोस्रो तथा टोलीका लाग तेस्रो गोल गरिन् ।

४७औं मिनेटमा चन्द्राले ह्याटिक पुरा गर्दा धनगढी खेलमा ४–० ले अघि बढ्यो । ७०औं मिनेटमा अन्जनाले गोल गरेपछि धनगढीले खेलमा ५–० को अग्रता लिदै फराकिलो जिततर्फ अघि बढ्यो । त्यसपछि चन्द्राले ८३औं मिनेटमा अर्काे गोल थप्दै टोलीको फराकिलो जित पक्का गरिन् ।

यस्तै अर्काे खेलमा ललितपुर महानगरपालिकाले चन्द्रपुर नगरपालिका रौतहटलाई १–० ले पराजित गरेको छ । ललितपुरको जितमा विष्णु साम्वाहाम्फेले पहिलो हाफमा गरेको गोल नै निर्णायक बन्यो । उनले पाँचौं मिनेटमा गोल गरेकी थिइन् ।

यस्तै अर्काे खेलमा नेपाल पुलिस क्लबले विराटनगर महानगरपालिकालाई २–० ले पराजित गरेको छ । पुलिसको जितमा दुवै गोल निर्मला उपाध्ययले गरिन् । निर्मलाले २५औं र ३३औं मिनेटमा गोल गरेकी थिइन् ।

योसँगै महिला राष्ट्रिय लिगको पहिलो राउन्डको खेल सकिएको छ । दोस्रो राउन्डको खेल आइतबारदेखि सुरु हुने अखिल नेपाल फुटबल संघ (एन्फा) ले जनाएको छ ।