काठमाडौं (हाम्रो खेलकुद) – सरस्वती युथ क्लबले सहिद स्मारक ‘बी’ डिभिजन लिगमा श्री भगवती क्लब टोखालाई पराजित गर्दै दोस्रो स्थानमा उक्लिएको छ । सरस्वतीले २–१ को जित निकालेको हो ।

सरस्वतीको जितमा दुवै गोल सनम धिमालले गोल गरे । श्री भगवतीका सुनिल श्रेष्ठले एक गोल फर्काए । सातदोबाटोस्थित एन्फा कम्प्लेक्सको खेल मैदानमा शुक्रबार भएको खेलमा सरस्वतीले खेलको ४४औं मिनेटमा सनम धिमालको गोलबाट पहिलो हाफमा १–० को अग्रता लिएको थियो ।

दोस्रो हाफको शुरुमै ४८औं मिनेटमा सुनिल श्रेष्ठले गोल गर्दै खेललाई १–१ गोलको बराबरीमा ल्याए । त्यसपछि ८१औं मिनेटमा सनम धिमालले व्यक्तिगत र टोलीका लागि दोस्रो गोल गर्दै सरस्वतीलाई महत्वपूर्ण जित दिलाए ।

यो जितसँगै सरस्वती ८ खेलबाट १५ अंक जोडेर दोस्रो स्थानमा उक्लिएको छ । सरस्वती शीर्षस्थानको चर्च ब्वाइज युनाइटेडसँग २ अंकले पछि छ । पराजित श्री भगवतीले दोस्रो स्थानमा उक्लने मौका गुमाउँदा चौथो स्थानमा झरेको छ । श्री भगवतीको ८ खेलबाट १३ अंक छ ।

लिगकै अर्काे खेलमा टुसाल युथ क्लबले वीरगन्ज युनाइेटेडमाथि ४–० को फराकिलो जित निकालेको छ । टुसालको जितमा जिलेप्सी जंग कार्की र ओम प्रकाश रोकाले समान दुई गोल गरे । यो जितसँगै टुसाल ८ खेलबाट ११ अंक जोडेर छैटौं स्थानमा उक्लिएको छ । पराजित वीरगन्ज १० अंक जोडेर सातौं स्थानमा रहेको छ ।

यस्तै लिगकै अर्काे खेलमा ब्वाइज युनियन क्लब र बाँसबारी क्लबले १–१ गोलको बराबरी खेल्दै अंक बाँडेका छन् । ब्वाइज युनियनका विनोद राईले गोल गर्दा बाँसबारीका निशान सुनारले बराबरी गोल फर्काए ।

यो बराबरीसँगै ब्वाइज युनिय ८ खेलबाट ५ अंक जोडेर पुछारमा रहेको छ । बाँसबारी १० अंक जोडेर आठौं स्थानमा रहेको छ ।