विनोदबाबु रिजाल, चितवन

राष्ट्रिय महिला लिगको उद्घाटन खेलमा अनिता बस्नेतको निर्णायक गोलसँगै एपिएफ फुटबल क्लब विजयी भएको छ । साविक विजेता समेत रहेको एपिएफले अर्को विभागिय टोली त्रिभुवन आर्मी फुटबल क्लबलाई २–१ ले हराउँदै लिगमा विजयी सुरुवात गरेको हो ।

चितवन भरतपुरस्थित सारदानगर फुटबल मैदानमा भएको खेलमा आर्मीले खेलमा लिएको अग्रता जोगाउन नसक्दा हार बेहोर्नुपरेको थियो । रश्मी घिसिङले ५२ औं पेनाल्टी गोलमार्फत आर्मीलाई अग्रता दिलाएकी थिइन् । एपिएफका लागि रेनुका नगरकोटे र अनिता बस्नेतले गोल गरेका थिए । रेनुकाले ५७ औं मिनेटमा बराबरी गोल गरेकी थिइन् । खेल सकिन ९ मिनेट बाँकी रहँदा अनिताले गरेको गोल खेलको निर्णयक बनेको थियो ।

एपिएफको दोस्रो गोलमा फाउल भएको भन्दै आर्मीका खेलाडीले मैदान छाडेका थिए । १० मिनेटपछि पुनः सञ्चालन भएको एन्फाले जनाएको छ । राष्ट्रिय टोली तथा एपिएफकी फरवार्ड सावित्रा भण्डारीले सोहि खेलमार्फत १३ महिनापछि फुटबलमा पूनरागमन गरेकी थिइन् । गत वर्ष राष्ट्रिय लिगमा फागुन ३ गते सावित्राको घुँडामा चोट लागेको थियो । त्यसपछि उनले कतार पुगेर घुँडाको शल्यक्रिया गरेकी थिइन् । रविना गोलेको टाँउमा ६० औं मिनेटमा मैदान प्रवेश गरेकी सावित्राले सानदार खेल प्रस्तुत गरेकी थिइन् ।