एजेन्सी – फिफा विश्वकप कतार २०२२ को युरोपियन छनोट अन्तरगतको प्ले अफको सेमिफाइनलमा आज (बिहीबार) राति युरो २०२० को विजेता इटालीले नर्थ म्यासेडोनियासँग प्रतिस्पर्धा गर्दैछ ।

खेल इटालीको घरेलु मैदान पालेर्माेमा नेपाली समयअनुसार राति १ः३० बजे हुनेछ । युरो विजेता इटाली तुलनात्मक रुपमा कमजोर नर्थ म्यासेडोनियालाई हराउँदै विश्वकपमा छनोट हुने सम्भावना जीवितै राख्ने लक्ष्यमा हुनेछ । यस खेलमा सफलता हात पारेको प्ले अफको फाइनलमा पोर्चुगल र टर्कीबीचको विजेतासँग खेल्नुपर्ने हुन्छ ।

नर्थ म्यासेडोनियाविरुद्ध टोलीसँग जर्जियो चिलियानी, सिरो इम्मोविले, लोरेन्जो इन्सिग्ने, डोमिनिको बेरारडी, मार्काे भेराट्टी, जर्गिन्हो, निको बरेल्ला, इमर्सन रोयल, एलेसान्द्रो बास्टोनी, जियानलुका मान्सिनी, एलेसान्द्रो फ्लोरेन्जी र गोलरक्षक जियानलुइजी डोन्नररुम्मा रहेका छन् ।

यस्तै माटियो पोलिटानो, निकोलो जानिलो र जियानकोमो रास्पाडोरी पनि रहँदा चोटका कारण लियोनार्दाे बोनुची र जियोभानी डि लोरेन्जो टोलीमा हुनेछैनन् ।

यता, नर्थ म्यासेडोनिया पनि इटालीलाई स्तब्ध पार्दै विश्वकपमा छनोट हुने सम्भावना बलियो बनाउने लक्ष्यमा हुनेछ । टोलीसँग ट्राजकोभ्स्की, रिस्टोभ्स्की, चुर्लीमोभ, बार्दी, एडेमी, निकोलोभ, एलिओस्की, मुस्लिउ र डिमिट्रिस्भ्कीलगायतका खेलाडी रहेका छन् ।

यि दुई टोली सन् २०१७ पछि खेल्न लागेका हुन् । यि दुई टोलीले २०१८ को विश्वकपका लागि समूह चरणमा प्रतिस्पर्धा गरेका थिए । जसमा इटालीले एक खेल ३–२ ले जित्दा एक खेल १–१ गोलको बराबरीमा सकिएको थियो ।