काठमाडौं (हाम्रो खेलकुद) – रानीपोखरी कर्नर टिम (आरसिटी) माथि महत्वपूर्ण जित निकाल्दै नयाँवस्ती युथ क्लब सहिद स्मारक ‘बी’ डिभिजन लिगको शीर्षस्थानमा उक्लिएको छ ।

नयाँवस्तीले आरसिटीमाथि १–० को झिनो जित निकाल्दै शीर्षस्थानमा उक्लन सफल भएको हो । सातदोबाटोस्थित एन्फा कम्प्लेक्सको खेल मैदानमा सोमबार भएको खेलमा नयाँवस्तीको जितमा खेलको अन्त्यतिर लिला बहादुर थापामगरले गरेको गोल नै निर्णायक बन्यो । उनले ८४औं मिनेटमा गोल गरेका थिए ।

यो महत्वपूर्ण जितसँगै नयाँबस्तीको ७ खेलबाट १३ अंक पुगेको छ । समान १३ अंक नै रहेपनि टोखा श्री भगवती गोलअन्तरमा पछि परेको छ । श्री भगवतीले एक खेल कम खेलेको छ । पराजित आरसिटीको ७ खेलबाट ९ अंक रहेको छ ।

लिगकै अर्काे खेलमा सामाजिक युथ क्लबले झम्सिखेल युथ क्लबलाई १–० ले पराजित गरेको छ । सामाजिकको जितमा छैटौ मिनेटमा बसन्त बहादुर रानाले गरेको गोल नै निर्णायक बन्यो । यो जितसँगै ७ खेलबाट ७ अंक जोडेको सामाजिक १२औंबाट नवौं स्थानमा उक्लिएको छ । पराजित झम्सिखेल ७ खेलबाट ६ अंक जोडेर दुई स्थान तल ११औं मा झरेको छ ।

लिगकै अर्काे खेलमा मध्यपुर युथ एसोसिएसनले खुमलटार युथ क्लबमाथि १–० कै जित निकालेको छ । मध्यपुरको जितमा १६औं मिनेटमा सजिन थापामगरले गरेको गोल नै निर्णायक बन्यो ।

यो जितसँगै मध्यपुरको ७ खेलबाट ७ अंक जोड्दै रेलिगेसन जोन छाडेको छ । मध्यपुर पुछारबाट १०औं स्थानमा उक्लिएको छ । पराजित खुमलटार ७ खेलबाट ९ अंक जोडेर पाँचौ स्थानमै रहेको छ ।