काठमाडौं (हाम्रो खेलकुद) – भारतमा जारी साफ यू–१८ महिला च्याम्पियनसिपमा नेपालले लगातार तेस्रो हार बेहोरेको छ । नेपालले घरेलु टोली भारतसँग ५–१ को फराकिलो हार बेहोरेको हो ।

यसअघि राउन्ड रोविन लिगको पहिलो खेलमा नेपालले भारतसँग ७–० को फराकिलो हार बेहोको थियो । भारतको जमसेदपुर स्थित जेआरडी टाटा कम्प्लेक्समा सोमबार भएको खेलमा भारतको फराकिलो जितमा लेन्डा कोम सेर्टाेले ह्याट्रिक पुरा गर्दा सिल्की देवी हेमाम र अनिता कुमारीले समान एका गोल गरिन् । नेपालकी सन्दिपा भोलानले एक गोल फर्काइन् ।

खेलको सुरुवातदेखि नै वर्चस्व कायम राखेको घरेलु टोली भारतले खेलको १६औं मिनेटमा सिल्की देवी हेमामको गोलबाट भारतले सुरुवाती अग्रता लिएको थियो । २३औं मिनेटमा लेन्डा कोम सेर्टाेले गोल गर्दै भारतको अग्रता दोब्बर पारिन् । ३८औं मिनेटमा लेन्डा कोम सेर्टाेले व्यक्तिगत दोस्रो तथा टोलीका लागि तेस्रो गोल गरेपछि भारत पहिलो हाफमा ३–० ले अघि बढ्यो ।

५६औं मिनेटमा अनिता कुमारीले गोल गर्दै भारतलाई ४–० ले अघि बढाइन् । ६१औं मिनेटमा लेन्डा कोम सेर्टाेले ह्याट्रिक पुरा गरेपछि भारत ५–० ले अघि बढ्यो । ७९औं मिनेटमा सन्दिपा भोलानले गोल गर्दै खेललाई ५–१ को अवस्थामा ल्याएपनि त्यसपछि थप गोल निस्कन नसक्दा भारतले लगातार तेस्रो जित तथा नेपालले तेस्रो हार बेहोर्न पुग्यो । परिवर्तित गोलरक्षकको गल्तीमा नेपालले गोल गर्न सफल भएको थियो ।

लगातार तेस्रो हारसँगै नेपालको उपाधि जित्ने सम्भावना सकिएको छ । नेपालमाथिको जितसँगै भारतको च्याम्पियन बन्ने सम्भावना बलियो बनेको छ । भारतले तीन खेलबाट ९ अंक जोडेको छ । अब भारतले आफ्नो अन्तिम खेलमा बंगलादेशलाई बराबरीमा रोकेपनि च्याम्पियन बन्ने छ । नेपालले अंकको खाता खोल्न सकेको छैन ।

बंगलादेशको २ खेलबाट ३ अंक छ । बंगलादेशलाई च्याम्पियन बन्न नेपाललाई हराउँदै अन्तिमा खेलमा भारतलाई पनि फराकिलो अन्तरले हराउनु पर्ने हुन्छ । पहिलो राउन्डमा भारत १–० ले विजयी भएको थियो । नेपालले राउन्ड रोविनको अन्तिम खेलमा २३ मार्चमा बंगलादेशसँग खेल्नेछ ।

डबल राउण्ड रोबिनको आधारमा हुने च्याम्पियनसिप भारतको जमसेदपुरमा मार्च १५ देखि २५ तारिखसम्म हुनेछ । च्याम्पियनसिपमा नेपाल, भारत र बंगलादेशको सहभागिता रहेको छ । शीर्ष टोलीले उपाधि जित्नेछ ।