काठमाडौं (हाम्रो खेलकुद) – उपाधि होडमा रहेको चर्च ब्वाइज युनाइटेडलाई पराजित गर्दै टोखा श्री भगवती सहिद स्मारक ‘बी’ डिभिजन लिगको शीर्षस्थानमा उक्लिएको छ ।

श्री भगवतीले चर्च ब्वाइजलाई २–१ ले पराजित गर्दै शीर्षस्थानमा उक्लन सफल भएको हो । सातदोबाटोस्थित एन्फा कम्प्लेक्सको खेल मैदानमा शनिबार भएको खेलमा श्री भगवतीको जितमा रुपेश क्षेत्री र सुनिल श्रेष्ठले गोल गरे । चर्च ब्वाइजका राज कनदङ्वाले एक गोल फर्काए ।

खेलको १६औं मिनेटमा रुपेश क्षेत्रीको गोलबाट श्री भगवतीले सुरुवाती अग्रता लिन सफल भयो । २०औं मिनेटमा राज कनदङ्वाले गोल गर्दै खेललाई १–१ गोलको बराबरीमा ल्याए । त्यसपछि ६०औं मिनेटमा सुनिल श्रेष्ठले गोल गर्दै टोलीको जित पक्का गरे ।

यो जितसँगै श्री भगवती ६ खेलबाट १३ अंक जोडेर शीर्षस्थानमा उक्लिएको छ । पहिलो हार बेहोरेको चर्च ब्वाइज ६ खेलबाट ११ अंक जोडेर तेस्रो स्थानमा रहेको छ । दोस्रो स्थानको सरस्वती युथ क्लबको १२ अंक छ ।

लिगकै अर्काे खेलमा सरस्वती युथ क्लब र श्री कुमारी क्लबले १–१ गोलको बराबरी खेल्दै अंक बाँडेका छन् । श्री कुमारीका विपिन थुम्सिङ मगरले गोल गर्दा सरस्वतीका सनम धिमालले बराबरी गोल फर्काए । विपिनले ४४औं मिनेटमा गोल गर्दा सनमले ८६औं मिनेटमा गोल गर्दै टोलीलाई हारबाट जोगए ।

यो बराबरीपछि सरस्वती ६ खेलबाट १२ अंक जोडेर दोस्रो स्थानमा उक्लिएको छ । श्री कुमारीको ६ खेलबाट ६ अंक पुगेको छ ।

अर्काे खेलमा बाँसबारी क्लब र वीरगन्ज युनाइटेडले १–१ गोलको बराबरी खेल्दै अंक बाँडेका छन् । बाँसबारीमा कोमल खवासले १०औं मिनेटमा गोल गर्दा वीरगन्जका कृपाकान्त महतो थारुले ७३औं मिनेटमा बराबरी गोल फर्काए ।

यो बराबरीपछि वीरगन्जको ६ खेलबाट ७ अंक पुगेको छ । बाँसबारीको ६ खेलबाट ६ अंक नै रहेको छ ।