काठमाडौं (हाम्रो खेलकुद) – नेपाल सुपर लिगको टोली एफसी चितवनले दोस्रो संस्करणका लागि स्थानीय स्तरमा रहेका प्रतिभावान खेलाडी छान्न ट्यालेन्ट हन्ट आयोजना गर्ने भएको छ ।

आइएमई समूह अन्तर्गतको गेम अनको स्वामित्व रहेको चितवनले आगामी आइतबार विहान ११:४० बजे चितवनको नारायणगढस्थित क्यापा चौरमा खेलाडी छनोट कार्यक्रम गर्दैछ । अप्रिल ८ बाट सुरु हुने भनिएको एनएसएलका लागि टोलीले अनन्त तामाङलाई मार्की खेलाडीका रुपमा अनुबन्ध गरेको छ ।

क्लबले होम ग्राउण्डको महत्त्वपूर्ण प्रतिनिधित्व होस् भन्ने उद्देश्यका साथ उक्त कार्यक्रम आयोजना गर्न लागिएको जनाएको छ । चितवन फुटबल संघको साथमा आयोजना हुने उक्त छनोटमा २३ वर्ष नपुगेका खेलाडीहरूले भाग लिन पाउने छन् । खेलाडीहरू कुनै पनि राष्ट्रिय स्तरको लीग प्रतियोगितामा नखेलेको हुनुपर्नेछ ।

चितवनले प्रशिक्षण टोलीमा तोपे फुजा प्राविधिक निर्देशक, याम गुरुङ मुख्य प्रशिक्षक तथा शैलेश कर्माचार्यलाई सहायक प्रशिक्षकको भूमिकामा नियुक्त गरेको छ । त्यस्तै रुपेश अधिकारी टोलीको व्यवस्थापकमा निरन्तर छन् ।

टिम : अनन्त तामाङ (मार्की), त्रिदेव गुरुङ (गोल्डेन बजर), अशोक बराल, लक्ष्मण रुचाल, विश्वास उदास, आयुष घलान, भुवन बस्नेत, राजन गुरुङ, संजोक राई, विशाल बस्नेत, टोप बहादुर राना, पासाङ लामा, राजबाबु थापा, प्रदीप लम्साल, जर्जप्रिन्स कार्की