काठमाडौं (हाम्रो खेलकुद)– महिला राष्ट्रिय टोली तथा एपिएफकी गोलकिपर अन्जिला तुम्बापो सुब्बाको कथामा फिल्म बन्ने भएको छ । उनको वास्तविक कथामा आधारित हुने फिल्मको नाम ‘अञ्जिला’ रहेको शुक्रबार पत्रकार सम्मेलनमार्फत जानकारी दिइयो । अञ्जिलाले फिल्ममा आफ्नो भूमिका उनी आफैले निर्वाह गर्ने भएकी छन् ।

केन्द्र मोसन पिक्चर्सको प्रस्तुतीमा रहने फिल्म निर्माणको सहकार्य मुन लभ इन्टरटेमेन्टले गर्नेछन । अन्जिलासँगै दयाहाङ राई, सृजना सुब्बा, बुद्धि तामाङ, माउत्से गुरुङ, प्रेमकुमार श्रेष्ठलगायतको फिल्ममा अभिनय रहने बताइएको छ ।

फिल्मको निर्मातामा प्रेमकुमार श्रेष्ठ, केन्द्र लिम्बु सह निर्मातामा विनोद अग्रवाल र राजेश अग्रवाल रहेका छन् । फिल्मको निर्देशन मिलन चाम्सले गर्नेछन् । निर्माता श्रेष्ठका अनुसार फिल्मको छायाङ्कन जेठ दोस्रो साताबाट सुरु हुनेछ । इलामको फिक्कल र काठमाडौंमा छयाङ्कन हुने फिल्म आगामी दशै आसपासमा प्रदर्शन गर्ने तयारी रहेको श्रेष्ठले जानकारी दिए ।

‘उनले आफ्नो इच्छाले खेलेकी हुन् । कसैको दबाब र प्रभावमा परेकी छैनन्,’ उनले भने, ‘अन्जिलाको संघर्ष अन्यको भन्दा फरक छ । उनको यस यात्रालाई प्राथमिकतामा राखेर सिनेमा निर्माण हुनेछ ।’

नेपाल खेलकुद पत्रकार मञ्चको आयोजनामा अर्को साता हुने पल्सर स्पोर्टस अवार्डको पिपुल्स च्वाइस अवार्डको मनोनयमा समेत रहेकी अञ्जिला राष्ट्रिय टोली र एपिएफकी पहिलो रोजाईकी गोलकिपर हुन् । गत वर्ष सम्पन्न राष्ट्रिय महिला लिगमा एपिएफ च्याम्पियन बन्दा टोलीको गोलपोष्ट उनले नै सम्हालेकी थिइन् । लिगका १२ खेलमा उनले मात्र एक गोलको सामना गर्नुपरेको थियो ।

उनले पाकिस्तानको राष्ट्रिय लिगमा मासा युनाइटेडबाट व्यवसायिक फुटबल खेलेकी थिइन् । गत वर्षको लिगमा उनले उक्त टोलीको कप्तानी समेत गरेकी थिइन् ।