काठमाडौं (हाम्रो खेलकुद) – नेपाल सुपर लिग (एनएसएल) का कारण उत्पन्न अन्यौलताका विषयमा ए डिभिजन क्लबरुले उठाएको माग सम्बोधनका लागि अखिल नेपाल फुटबल संघ (एन्फा) तयार देखिएको छ ।

एनएसएलका लागि फागुन २० गतेको अक्सन रोक्न पत्र काटेको एन्फाले त्यसबाहेक औपचारिक कुनै निर्णय गरेको थिएन । सुरुमा ८ र पछि ४ क्लबले लगातार रुपमा एन्फाले अहिले देखिएको विवाद समाधानका लागि पहल लिन आग्रह गर्दै आएको थियो । जसलाई सम्बोधन गर्ने क्रममा एन्फाको १८ औं केन्द्रिय कार्यसमितिको बिहीबार सम्पन्न बैठकले एन्फा अध्यक्ष कर्मा छिरिङ शेर्पाको संयोजकत्वमा ७ सदस्यीय कार्यदल गठन गर्ने निर्णय गरेको छ ।

एनएसएलका कारण उत्पन्न विवादका विषयमा छलफल गर्न एन्फाले ए डिभिजन क्लबका ४ क्लबका प्रतिनिधिसँग छलफल गर्ने भएको छ । गत साता न्यूरोड टिम एनआरटी, मनाङ मस्र्याङ्दी क्लब, थ्री स्टार क्लब र संकटा क्लबका पदाधिकारीले संयुक्त पत्रकार सम्मेलनमार्फत आफ्ना खेलाडीहरु रिलिज नगरी एनएसएल अक्सनमा राख्नु जायज नभएको भन्दै त्यसको समाधान निकाल्न छलफलका लागि एन्फालाई आग्रह गरेको थियो ।

त्यसअघि फागुन १५ गते यी चारसहित लिग विजेता मछिन्द्र फुटबल क्लब, सातोदाबोटो युथ क्लब, जावलाखेल युथ क्लब र फ्रेन्ड्स क्लब गरि ८ क्लबका पदाधिकारीले संयुक्त विज्ञप्ती जारी गरि एनएसएलका कारण खेलाडीको दोहोरो सम्झौता हुने सम्भावना रहेकोले त्यसलाई आवश्यक समन्वय गर्न विज्ञप्तीमार्फत अनुरोध गरेका थिए ।

यस्तै दुई सम्म चलेको एन्फा बैठकले केन्द्रिय कार्यसमितिको निर्वाचन २०७९ जेठ १५ गते नै गर्ने पुनः निर्णय गरको छ । एन्फाले यसअघि केन्द्र, जिल्ला र प्रदेशको निर्वाचनको मिति तय गरेको थियो । तर, फिफा र एएफसीबाट निर्वाचन कार्यविधिमा केहि फेरबदल गर्न सुझाव दिएपछि पूर्व निर्धारित जिल्ला संघको निर्वाचित एन्फाले स्थगित गरेको जनाएको थियो ।

त्यस्तै एन्फाले ४८ जिल्ला सदस्यको निर्वाचिन २०७९ वैशाख १ देखि १० गते सम्मका लागि तय गरेको छ । त्यसअघि निर्वाचन कार्यविधि अनुमोदनका लागि एन्फाले चैत १५ गतेका लागि विशेष साधारण सभा गर्ने तय गरेको छ । विशेष साधारण सभा यसअघि दुई पटक स्थगित भइसकेको थियो ।