लमजुङ (हाम्रो खेलकुद) – चक्रतीर्थ युवा क्लब सातविसे लमजुङले प्रथम ऐतिहासिक राइनास कप खुल्ला पुरुष फुटबल प्रतियोगिताको उपाधि जितेको छ ।

गौलिटार क्षेत्रीय खेल मैदानमा बुधबार भएको फाइनलमा मर्स्याङ्दी युवा क्लब हवाई ग्राउन्ड गोरखा पालुङटारलाई २–१ ले पराजित गर्दै उपाधि जितेको हो । उपाधिसँगै चक्रतीर्थले १ लाख ५० हजार रुपैयासँगै कप र मेडल जितेको छ । दोस्रो भएको मर्स्र्याङ्दी युवा क्लबले १ लाख रुपैयासँगै कप र मेडल हात पारेको छ ।

सान्त्वना भएको आयोजक गौलिटार क्षेत्रीय खेल मैदान समिति र जनविकास मावि बेशीशहरले समान २५–२५ हजार प्राप्त गरेको आयोजकले जनाएको छ । जनविकासले अनुशाषित टोली हुँदै थप १० हजार रुपैया जितेको छ ।

मर्स्याङ्दी युवा क्लबका सुन्दर बस्याल सर्वाेत्कृष्ट खेलाडी घोषित भए । मर्स्याङ्दीकै साजन विक सर्वाधिक गोलकर्ता चुनिए । च्याम्पियन टोली चक्रतीर्थका विक्रम थापा उत्कृष्ट गोलरक्षक चुनिए । उनीहरु सबैले जनही १० हजार प्राप्त गरे ।

विजयी टोली तथा खेलाडीलाई राइनास नगरपालिकाका मेयर सिंह बहादुर थापा, उपमेयर धनकुमारी गुरुङ, गौलिटार क्षेत्रीय खेल मैदान समितिका सल्लाहकार समितिका संयोजक तथा नेपाली कांग्रेस लमजुङको पुर्व पार्टी सभापति तुलसी नारायण श्रेष्ठ, गौलिटार क्षेत्रीय खेल मैदान समितिका अध्यक्ष टकेन्द्रनाथ चिलुवाललगायतले पुरस्कृत गरे ।

गौलिटार क्षेत्रीय खेल मैदान समिति राइनास नगरपालिका ६ धमिलीकुवाको आोजनामा २७ फागुनबाट सुरु भएको प्रतियोगितामा विभिन्न १३ टोलीको सहभागिता रहेको थियो । खेल नकआउटको आधारमा भएको थियो ।

गौलिटार क्षेत्रिय खेलमैदान समितिले खेलमैदानको निमार्ण पश्चात पहिलोपटक राइनस कप खुल्ला फुटबल प्रतियोगिता आयोजना गरेको हो ।