एजेन्सी – पोर्चुगिज फरवार्ड क्रिस्टियानो रोनाल्डो व्यावसायिक फुटबल करिअरमा १२ वर्षपछि उपाधिविहिन बन्ने भएका छन् । सन् २००९/१० यता रोनाल्डोले सिजनभर पहिलो पटक कुनै उपाधि जित्न नसकेका हुन् ।

मंगलबार भएको यूईएफए च्याम्पियन्स लिगको राउन्ड अफ १६ अन्तर्गत दोस्रो लेगमा एटलेटिको म्याड्रिडसँग १-० ले पराजित हुँदै प्रतियोगिताबाट बाहिरिएको हो । पहिलो लेग १-१ को बराबरीमा सकिएको खेल एटलेटिकोले समग्रमा २-१ ले जित्दै क्वाटरफाइनलमा स्थान पक्का गरेको थियो । यससँगै युनाइटेडले यस सिजन कुनै उपाधि नजित्ने पक्का भएको हो ।

यसअघि युनाइटेड एफए कपको चौथो चरणमा दोस्रो श्रेणीको मिडल्सब्रोसँग पराजित भएको थियो । त्यस्तै लिग कपको तेस्रो चरणमा वेस्ट ह्याम युनाइटेडले युनाइटेडमाथि १-० को जित दर्ता गरेको थियो । प्रिमियर लिगमा शीर्षस्थानको म्यानचेस्टर सिटीभन्दा युनाइटेड २० अंकले पछि छ । गणितीय रुपमा युनाइटेडको सम्भावना कायम रहेपनि टोलीको च्याम्पियन्स लिगमा छनोट हुने मुख्य लक्ष्य हुनेछ ।

रोनाल्डोले पछिल्लो पटक सन् २००९/१० सिजनमा कुनै उपाधि जितेका थिएनन् । त्यसबेला म्यानचेस्टर युनाइटेड छाडेर रियल म्याड्रिड पुगेका रोनाल्डोको व्यक्तिगत प्रदर्शन राम्रो रहेपनि टोलीले उपाधि जितेको थिएन । यस सिजन पनि रोनाल्डोले सबै प्रतियोगितामा १८ गोल गरेका छन् । तर युनाइटेड भने पुन: अर्को सिजन उपाधिविहिन नै बन्यो ।

युनाइटेडले सन् २०१७ मा युरोपा लिगको जितेयता कुनै उपाधि जित्न सकेको छैन । त्यसयता रोनाल्डोले व्यक्तिगत रुपमा भने दुई पटक च्याम्पियन्स लिग, २ पटक इटालियन सिरी ए र क्लब विश्वकपसँगै रियल र युभेन्टसका लागि घरेलु उपाधि जितेका थिए । युनाइटेडमा फर्केको पहिलो सिजन भने उनले उपाधिको सिलसिलालाई निरन्तरता दिन सकेनन् ।