काठमाडौं (हाम्रो खेलकुद) – कोलम्बियामा सोमबार भएको विमान दुर्घटनामा मृत्यु भएका ७१ जनाको शोकमा राजधानीमा शुक्रबार दिप प्रज्वलन गरिएको छ । नेपाल खेलकुद पत्रकार मञ्चले त्रिपुरेश्वरस्थित दशरथ रंगशाला भित्र शुक्रबार साँझ मृतक आत्माको चिर शान्तीको कामना गर्दै दीप प्रज्वलन र शोकसभा गरेको छ ।

कोलम्बियामा बुधबारका लागि तय कोपा सुदामेरिका कपको फाइनलको पहिलो लेग खेल्न कोलम्बिया जाने क्रममा ब्राजिली फुटबल क्लब चापाकोऐन्सीको खेलाडी चढेको विमान दुर्घटना भएको थियो । विमानमा रहेका खेलाडी, पत्रकारसँगै विमानमा सवार ७१ जनाको मृत्यु भएको थियो । ७१ वटा मैनबत्ती बालेर मृतकहरुको सम्झाना गर्नुअघि शोकसभामा सहभागीले मृतकको सम्झनामा १ मिनेट मौनधारण गरेका थिए ।

शोक सभामा नेपाल ओलम्पिक कमिटीका अध्यक्ष जिवनराम श्रेष्ठ, नेपाल पत्रकार महासंघका अध्यक्ष महेन्द्र विष्ट, उपाध्यक्ष अनीता विन्दु, राष्ट्रिय खेलकुद परिषद्का उपाध्यक्ष एवंन् ओलम्पिक कमिटीका महासचिव लामा टेण्डी शेर्पाको उपस्थिति थियो । त्यस्तै नेपाल राष्ट्रिय तथा अन्तर्राष्ट्रिय खेलाडी संघका अध्यक्ष दीपक विष्ट, महासचिव दीपक श्रेष्ठ, राष्ट्रिय फुटबल टोलीका प्रशिक्षक राजु शाक्य, पूर्व कप्तान हरि खड्का, राष्ट्रिय टोलीका खेलाडी विक्रम लामा, विशाल श्रेष्ठ, रविन श्रेष्ठ, रोहित चन्द, मञ्चका सदस्य खेल पत्रकार, फोटो पत्रकार र अन्य खेलाडीको उपस्थित थियो ।

।