काठमाडौं (हाम्रो खेलकुद) – साफ यू–१८ महिला च्याम्पियनसिपको पहिलो खेलमा नेपालले फराकिलो हार बेहोरेको छ । नेपालले घरेलु टोली भारतसँग ७–० को फराकिलो हार बेहोरेको हो ।

भारतको जमसेदपुर स्थित जेआरडी टाटा कम्प्लेक्समा मंगलबार भएको खेलमा भारतको फराकिलो जितमा लेन्डा कोम सेर्टाेले दुई तथा सुजिस पोट्टेकाट, अपुर्णा नार्जरी, पुर्णिमा कुमारी, सुनिता मुन्डा र नितु लिन्डाले गोल गरिन् । भारतले पहिलो हाफमा तीन तथा दोस्रो हाफमा चार गोल थपेको थियो ।

खेलको सुरुवातदेखि नै वर्चस्व कायम राखेको घरेलु टोली भारतले खेलको १५औं मिनेटमा सुजिसको गोलबाट भारतले सुरुवाती अग्रता लिएको थियो । नेपाली गोलरक्षक सावित्री किसानले पञ्च गरेको बललाई सुजिसले जाली चुमाएकी थिइन् ।

१७औं मिनेटमा लेन्डा कोम सेर्टाेले अनिता कुमारीको पासमा गोल गर्दै भारतलाई २–० ले अघि बढाइन् । ३४औं मिनेटमा लेन्डा कोम सेर्टाेले रितु देवीको क्रसमा व्यक्तिगत दोस्रो तथा टोलीका लागि तेस्रो गोल गर्दै भारतलाई पहिलो हाफमा ३–० ले अघि बढाइन् ।

६९औं मिनेटमा अपुर्णा नार्जरी गोलले गोल गरेपछि भारत खेलमा ४–० ले अघि बढ्यो । ७६औं मिनेटमा पुर्णिमा कुमारीले गोल गर्दै भारतलाई फराकिलो जिततर्फ अग्रसर गराइन् । ८७औं सुनिता मुन्डाले गोल गरेपछि भारत खेलमा ६–० ले अघि बढाइन् ।

भारत यतिमै रोकिएन । इन्ज्युरी समयको थप गरिएको सातौ मिनेटमा लिन्डाले गोल गर्दै भारतलाई फराकिलो जित दिलाइन् । नेपालले कुनै पनि समय बलियो भारतको पोस्टमा आक्रमण बुन्न फराकिलो हार बेहोर्न पुग्यो ।

डबल राउण्ड रोबिनको आधारमा हुने च्याम्पियनसिप भारतको जमसेदपुरमा मार्च १५ देखि २५ तारिखसम्म हुनेछ । च्याम्पियनसिपमा नेपाल, भारत र बंगलादेशको सहभागिता रहेको छ । नेपालले दोस्रो खेलमा मार्च १७ मा बंगलादेशको सामना गर्नेछ । यस्तै मार्च २१ मा फेरि भारतसँग खेल्दा नेपालले मार्च २३ मा बंगलादेशसँग खेल्ने तालिका छ । शीर्ष टोलीले उपाधि जित्नेछ ।