काठमाडौं (हाम्रो खेलकुद) – टुसाल युथ क्लब र सामाजिक युथ क्लबले सहिद स्मारक ‘बी’ डिभिजन लिगमा पहिलो जित गरेको छ । टुसालल खुमलटार युथ क्लबलाई ३–० ले पराजित गर्दै लिगमा पहिलो जित दर्ता गरेको हो ।

सातदोबाटोस्थित एन्फा कम्प्लेक्सको खेल मैदानमा सोमबार भएको खेलमा टुसालको जितमा दीप कुमार लामा र गिलेस्पी जंग कार्कीले गोल गर्दा एक गोल उपहार पाएको थियो ।

खेलको ३६औं मिनेटमा रमेश थापाको आत्मघाती गोलबाट टुसालले सुरुवाती अग्रता लिएको थियो । ८३औं मिनेटमा दीप कुमार लामाले गोल गर्दै टुसालको अग्रता दोब्बर पारे । ८९औं मिनेटमा गिलेस्पी जंग कार्कीले गोल गर्दै टुसालको सहज जित पक्का गरे । यो जितसँगै टुसालको ५ खेलबाट ६ अंक पुगेको छ । पराजित खुमलटारको पनि ५ खेलबाट ६ अंक नै रहेको छ ।

यस्तै सामाजिक युथ क्लबले पहिलो जित हात पार्ने क्रममा ब्वाइज युनियन क्लबलाई ३–१ ले पराजित गरेको छ । सामाजिकले पछि परेको स्थिति उल्ट्याएर जित निकालेको हो । सामाजिकको जितमा सुरेश खत्रीले दुई तथा बसन्त बहादुर रानाले एक गोल गरे । ब्वाइज युनियनका विवेक राईले एक गोल फर्काए ।

खेलको चौथो मिनेटमा विवेकल गोल गर्दै ब्वाइज युनियनलाई सुरुवाती अग्रता दिलाए । तर, ब्वाइज युनियनले त्यो अग्रतालाई जोगाउन सकेन । २१औं मिनेटमा सुरेश खत्रीले गोल गर्दै खेललाई १–१ गोलको बराबरीमा ल्याए । २६औं मिनेटमा बसन्त बहादुर रानाले गोल गर्दै सामाजिकलाई २–१ ले अघि बढाए । पहिलो हाफको इन्ज्युरी समयको थप गरिएको दोस्रो मिनेटमा सुरेशले व्यक्तिगत दोस्रो तथा टोलीका लागि तेस्रो गोल गर्दै सामाजिकलाई ३–१ को अग्रता दिलाए ।

दोस्रो हाफमा थप गोल निस्कन नसक्दा पहिलो हाफको नतिजा नै सामाजिकलाई पहिलो जित निकाल्न पर्याप्त बन्यो । जितसँगै सामाजिकको ५ खेलबाट ४ अंक पुगेको छ । पराजित ब्वाइज युनियनको ५ खेलबाट ३ अंक छ ।

लिगकै अर्काे खेलमा झम्सिखेल युथ क्लब र नयाँ बस्ती युथ क्लबले १–१ गोलको बराबरी खेल्दै अंक बाँडेका छन् । नयाँ बस्तीका सुमन योङयाले गोल गर्दै झम्सिखेलका सन्जय रम्तेलले बराबरी गोल फर्काए । यो बराबरीसँगै नयाँ बस्तीको ५ खेलबाट ७ अंक पुगेको छ । झम्सिखेलको ५ खेलबाट ६ अंक पुगेको छ ।