काठमाडौं (हाम्रो खेलकुद) – ब्रिगेड ब्वाइज क्लब ए डिभिजन लिगबाट रेलिगेसनमा परेसँगै मनाङ मर्स्याङ्दी क्लबबाट खप्तड गोल्डकप खेल्न पुगेका विंगर शिशिर लेखि पाँचौ सुदूरपश्चिम खप्तड गोल्डकपको सर्वोत्कृष्ट खेलाडी घोषित भएका छन् ।

मनाङलाई उपाधि दिलाउने क्रममा महत्त्वपूर्ण भूमिका निर्वाह गरेका शिशिरले एक लाख रुपैयाँ प्राप्त गरे । च्याम्पियन मनाङकै विशाल सुनार उत्कृष्ट गोलरक्षक तथा राजेन्द्र तामाङ उत्कृष्ट प्रशिक्षक घोषित भए । रेलिगेसनमा परेको अर्को क्लब च्यासल युवा क्लबबाट मनाङ पुगेका मौसा अवगाना उत्कृष्ट मिडफिल्डर भए ।

फ्रेन्ड्सका सुरज विश्वकर्मा उत्कृष्ट डिफेन्डर घोषित हुँदा फ्रेन्ड्सकै जमोल एन्थोनी फ्रान्चोआ सर्वाधिक गोलकर्ता भए । सुदुरपश्चिम ११ का फागुराम चौधरी उदयमान खेलाडी भए । व्यक्तिगत विधातर्फ सबै विजेताले जनही २० हजार रुपैयाँ प्राप्त गरे ।

धनगढी रंगशालामा शनिबार मनाङले फ्रेन्ड्सलाई ३–१ ले हराउँदै खप्तड गोल्डकपको पाँचौं संस्करणको उपाधि जितेको हो । यसअघि पहिलो संस्करण पनि मनाङले जितेको थियो । मनाङको जितमा दीनेश राजवंशी, ओलावाले अफिज र मौस अबगनाले गोल गरेका थिए । फ्रेन्ड्सका लागि जमोल एन्थोनीले गोल गरेका थिए ।

सुदूरपश्चिम ११ फुटबल क्लबले आयोजना गरेको सर्वाधिक पुरस्कार राशीको खप्तड गोल्डकपको विजेता मनाङले उपाधिसहित २१ लाख र दोस्रो भएको फ्रेन्ड्सले १० लाख रुपैयाँ प्राप्त गर्यो ।