धनगढी (हाम्रो खेलकुद)– ओलावाले अफिजको गोलमा मनाङ मस्र्याङ्दी क्लबले मुख्यमन्त्री सुदूरपश्चिम खप्तड गोल्ड कपको फाइनलमा पुनः अग्रता लिएको छ ।

अर्को ए डिभिजन टोली फ्रेन्ड्स क्लबविरुद्ध अफिजले ७१ औं मिनेटमा गोल गर्दै मनाङलाई २–१ ले अगाडि बढाए । विपक्षी खेलाडीको आपसी तालमेल नमिल्दा अफिजले गोल गरेका थिए । फ्रेन्ड्सले ५१ औं मिनेटमा बराबरी गोल फर्काएको थियो । पहिलो हाफमा पेनाल्टीमा गोल गर्न चुकेका जमुअल फ्रान्स्वाले विपक्षी खेलाडीको गल्तीको फाइदा उठाउँदै खेललाई बराबरी गरेका थिए । मनाङका फ्राक्लिङले गोलकिपर विशाल सुनारलाई ब्याक पासमा दिएको बललाई नियन्त्रणमा लिदै फ्रान्स्वाले गोल गरेका थिए ।

पहिलो हाफमा दीनेश राजवंशीको गोलबाट मनाङले १–० को अग्रता लिएको थियो । खेलको २२ औं मिनेटमा झण्डै ३० यार्ड टाढा प्राप्त फ्रिकिकमा दीनेशले गोल गरेका हुन् । उनको फ्रिकिकलाई रोक्न फ्रेन्ड्सका गोलकिपर राहुल यादव असफल भएका थिए । त्यसअघि फ्रेन्ड्सले खेलमा अग्रता लिने मौका गुमाएको थियो । १७ औं मिनेटमा फ्रान्स्वाको पेनाल्टीलाई मनाङका गोलकिपर विशालले रोकेका थिए । बल नियन्त्रणको प्रयास गरिरहेका श्याम क्यापछाकीलाई विपक्षी खेलाडीले पेनाल्टी बक्समा फाउल गरेपछि फ्रेन्ड्सले पेनाल्टी पाएको थियो ।

सहिद स्मारक ए डिभिजन लिगका सर्वाधिक गोलकर्ता रहेका फ्रान्स्वाको खप्तड गोल्डकपमा गोल संख्या ४ पुगेको छ । दुई महिना अघि दशरथ रंगशालामा सहिद स्मारक ए डिभिजन लिगमा मनाङले फ्रेन्ड्सलाई २–० ले हराएको थियो । त्यो खेलमा पनि आफिज र दीनेशले नै मनाङका लागि गोल गरेका थिए । घरेलु फुटबलको सर्वाधिक पुरस्कार राशीको खप्तड गोल्डकपको विजेताले २१ लाख र दोस्रो हुने टोलीले १० लाख रुपैयाँ प्राप्त गर्नेछ ।