काठमाडौं (हाम्रो खेलकुद) – श्री भगवती क्लब टोखा सहिद स्मारक ‘बी’ डिभिजन लिगको शीर्षस्थानमा उक्लिएको छ । श्री भगवतीले पुछारमा रहेको सामाजिक युथ क्लबमासथ ३–२ को जित निकाल्दै शीर्षस्थानमा उक्लिएको हो ।

सातदोबाटोस्थित एन्फा कम्प्लेक्सको खेल मैदानमा शुक्रबार भएको खेलमा श्री भगवतीको जितमा सन्तोष केसी, अनिल गुरुङ र अनुज भण्डारीले गोल गरे । सामाजिकका विकास तितुङ र बसन्त बहादुर रानाले गोल फर्काए ।

खेलको ३५औं मिनेटमा सन्तोष केसीको गोलबाट अग्रता लिएको श्री भगवतीले पहिलो हाफको इन्ज्युरी समयको थप गरिएको पहिलो मिनेटमा अनिल गुरुङको गोलबाट अग्रता दोब्बर पारेको थियो ।

दोस्रो हाफमा सामाजिकले १० मिनेटको अन्तरमा दुई गोल गर्दै खेललाई २–२ गोलको बराबरीमा ल्याएा थिए । ५०औं मिनेटमा कप्तान विकास तितुङले तथा ६०औं मिनेटमा बसन्त बहादुर रानाले गोल गर्दै खेललाई २–२ गोलको बराबरीमा ल्याए । तर, ६६औं मिनेटमा परिवर्तित खेलाडी अनुज भण्डारीले गोल गर्दै श्री भगवतीलाई महत्वपूर्ण ३ अंक दिलाए । अनुज ५९औं मिनेटमा उर्केन जङ्वु शेर्पाको स्थानमा मैदान छिरेका थिए ।

जितसँगै शीर्षस्थानमा उक्लिएको श्री भगवतीको ४ खेलबाट १० अंक पुगेको छ । एक खेल कम खेलेको चर्च ब्वाइज युनाइटेडको ९ अंक छ । पराजित सामाजिक ४ खेलबाट १ अंक जोडेर पुछारमा रहेको छ ।

लिगकै अर्काे खेलमा नयाँबस्ती युथ क्लबले लिगमा पहिलो जित हात पार्ने क्रममा ब्वाइज युनियन क्लबमाथि ३–२ को जित निकालेको छ । नयाँबस्तीको जितमा सुमन योङ्या, रोशन आङ्देम्वे र सोम थापाले गोल गरे । ब्वाइज युनियनका विनोद राई र रिवोस मास्केले गोल गरे ।

जितपछि नयाँबस्ती चार खेलबाट ६ अंक जोडेर चौथो स्थानमा उक्लिएको छ । ब्वाइज युनियन ४ खेलबाट ३ अंक जोडेर ११औं स्थानमा रहेको छ ।

यस्तै सरस्वती युथ क्लबले खुमलटार युथ क्लबलाई २–१ ले पराजित गरेको छ । सरस्वतीको जितमा अर्जुन गुरुङ र अनिष परियारले गोल गरे । खुमलटारका सविन केसीले एक गोल फर्काए । जितपछि सरस्वती ४ खेलबाट ८ अंक जोडेर तेस्रो स्थानमा उक्लिएको छ । पराजित खुमलटार ४ खेलबाट ६ अंक जोडेर पाँचौ स्थानमा झरेको छ ।