एजेन्सी – इंग्लिस क्लब लेस्टर सिटीले युरोपा कन्फ्रेन्स लिगको प्रि–क्वाटरफाइनलको पहिलो लेगमा फ्रान्सेली क्लब रेनेसलाई पराजित गरेको छ । घरेलु मैदानमा लेस्टरले रेनेसलाई २–० ले हराएको हो ।

किङ पावर स्टेडियममा बिहीबार राति भएको खेलमा घरेलु टोलीको सहज जितमा मार्क अल्ब्राइटन र केलिची इहानाँचोले गोल गरे । पहिलो र दोस्रो हाफमा समान एक गोल निस्किएको थियो । खेलको ३०औं मिनेटमा मार्क अल्ब्राइटनको गोलबाट लेस्टरले पहिलो हाफमा १–० को अग्रता लिन सफल भयो ।

उनले हार्भे बार्नेसको पासमा गोल गर्न सफल भएका थिए ।इन्ज्युरी समयको थप गरिएको तेस्रो मिनेटमा परिवर्तित केलिची इहानाचोले गोल गर्दै लेस्टरको जित पक्का गरे । ६२औं मिनेटमा पाटसन डाँकाको स्थानमा मैदान छिरेका केलिचीले मार्क अल्ब्राइटनको पासमा गोल गर्न सफल भएका थिए ।

यो जितसँगै लेस्टरले क्वाटरफाइनल पुग्ने सम्भावना बलियो बनाएको छ । दोस्रो लेगमा यही नतिजा कायम राख्न सके लेस्टर क्वाटरफाइनलमा प्रवेश गर्नेछ । रेनेसलाई भने नतिजा उल्ट्याउनुपर्नेछ । दोस्रो लेग रेनेसको मैदानमा १७ मार्चमा हुनेछ ।

अन्य नतिजा
पाओक थेसालोनिकी एफसीविरुद्ध जेन्ट (१–०), पार्टीजान वियोग्राडविरुद्ध फिएनुर्ड (२–५), स्लाभिया प्राहाविरुद्ध लास्क (४–१), भिटेसेविरुद्ध रोमा (०–१), बोडो/ग्लिम्टविरुद्ध एजेट अल्कामार (२–१), मार्सेविरुद्ध बसेल (२–१) र पिएसभी इन्डोभेनविरुद्ध कोपेनहेगन (४–४)