काठमाडौं (हाम्रो खेलकुद) – श्री कुमारी क्लब र रानीपोखरी कर्नर टिम (आरसिटी) ले सहिद स्मारक ‘बी’ डिभिजन लिगमा बराबरी खेल्दै अंक बाँडेका छन् ।

सातदोबाटोस्थित एन्फा कम्प्लेक्सको खेल मैदानमा बिहीकार भएको खेलमा श्री कुमारी र आरसिटीले १–१ गोलको बराबरी खेलेका हुन् ।

खेलको चौथो मिनेटमा श्रीजन राज गौतमको गोलबाट श्री कुमारीले सुरुवाती अग्रता लिएको थियो । तर, त्यो गोलको एक मिनेटपछि नै प्रज्वल गुरुङले गोल गर्दै खेललाई १–१ गोलको बराबरीमा ल्याए । त्यसपछि थप गोल निस्कन नसक्दा खेल बराबरीमा टुंगियो ।

यो बराबरीसँगै आरसिटी ३ खेलबाट ४ अंक जोडेर छैटौ स्थान रहँदा तीन बराबरी खेलेको श्री कुमारी ३ अंकसहित आठौं स्थानमा रहेको छ । लिगकै अर्काे खेलमा टुसाल युथ क्लब र झम्सिखेलयुथ क्लबले गोलरहित बराबरी खेल्दै अंक बाँडेका छन् । दुवै टोलीले केही मौका सिर्जना गरेपनि सदुपयोग गर्न सकेनन् ।

बराबरीपछि झम्सिखेल ४ खेलबाट ५ अंक जोडेर पाँचौ स्थानमा रहेको छ । टुसाल ४ खेलबाट ३ अंक जोडेर १२औं स्थानमा रहेको छ ।

लिगमा शुक्रबार तीन खेल हुनेछ । शुक्रबार ब्वाइज युनियन र नयाँबस्ती, सरस्वती र खुमलटार तथा श्री भगवती र सामाजिक युथ क्लबबीच प्रतिस्पर्धा हुनेछ । सबै खेल एन्फा कम्प्लेक्सको खेल मैदानमा हुनेछ ।