एजेन्सी – यूईएफए च्याम्पियन्स लिग अन्तर्गत राउन्ड अफ १६ को खेलमा रियल म्याड्रिडले करीम बेन्जेमको ह्याट्रिकको मदतले फ्रान्सेली क्लब पेरिस सेन्ट जर्मेन (पिएसजी) लाई पराजित गर्यो । उक्त खेलपछि पिएसजीका अध्यक्ष नासेर अल खलिफीले रेफ्री कक्षभित्र पसेर रेफ्रीको उपकरण तोडफोड गरेका छन् ।

पिएसजी अध्यक्ष खलिफी खेलपछि रिसले मुर्मुरिंदै रेफ्रीको खोजीमा निस्केका थिए । पिएसजीका अध्यक्ष खलिफी र खेलकुद निर्देशक लिओनार्दोले रेफ्रीको निर्णयप्रति भीआइपी बक्सबाट नै असन्तुष्टि व्यक्त गरेका थिए । बेन्जेमाले बराबरी गोल गर्ने क्रममा गोलरक्षक डोनारुम्मामाथि फल गरेको उनीहरुको भनाइ थियो । सोही निर्णय आफ्नो पक्षमा नगएपछि पिएसजीका अध्यक्ष लगायत अधिकारी रुष्ट बनेका थिए ।

खेल सकिएलगत्तै दुवै खलिफी र लिओनार्दोले लज्जास्पद निर्णय भएको भन्दै बर्नाबाउको टनलतर्फ लागेका थिए । सुरुवातमा रेफ्रीको खोजीमा लागेका उनीहरु असफल भएपछि रेफ्रीको कक्षनिर पुगेका थिए । उनीहरुले रेफ्रीको ढोका हिर्काएका थिए । त्यसपछि सुरक्षा व्यवस्थामा खटिएका स्टाफले उनीहरुलाई रोक्नुपरेको थियो । अध्यक्ष खलिफीले रेफ्री कक्षभित्र रहेको उपकरण तोडेको आधिकारिक म्याच रिपोर्टमा उल्लेख गरिएको बताइएको छ ।

रियलका स्टाफहरुले आफूले कुनैपनि क्लबका अधिकारीहरुको यस्तो व्यवहार नदेखेको बताएका छन् । खेलपछि पोस्ट म्याच कन्फरेन्समा पिएसजीका प्रशिक्षक माउरिसियो पोचेटिनोले पनि रेफ्रीको निर्णयप्रति असन्तुष्टि जाहेर गरेका थिए ।

रियल र पिएसजीबीच विगत केही समययता राम्रो सम्बन्ध रहेको छैन । रियलले पिएसजीका फरवार्ड किलीयन एमबाप्पे अनुबन्ध गर्न खोजेका कारण पनि पिएसजी रुष्ट बनेको थियो । यस नतिजाले क्लबबीच थप चिसोपना उत्पन्न भएको छ ।