एजेन्सी– रियल म्याड्रिड र पेरिस सेन्ट जर्मेन (पिएसजी) बीच बुधबार राती च्याम्पियन्स लिग क्वार्टरफाइनल प्रवेशका लागि प्रतिस्पर्धा हुँदैछ । घरेलु मैदानमा पिएसजीको सामना गर्दा रियलसँग पहिलो लेगको नतिजा उल्टाउनु पर्ने चुनौती हुनेछ ।

अन्तिम १६ को पहिलो लेगमा पिएसजीले रियललाई १–० ले हराएको थियो । युवा स्ट्राइकर केलियन एमबाप्पेले दोस्रो हाफको इन्ज्युरी समयमा गोल गर्दै पिएसजीलाई महत्वपूर्ण जित दिलाएका थिए । तर, रियलसँग दोस्रो लेगमा नतिजा उल्टाउँदै अन्तिम ८ मा पुग्ने सम्भावना भने रहनेछ । रियल घरेलु मैदानमा कसरी प्रस्तुत हुन्छ त्यो भने धेरैका लागि कौतुहलताको विषय हुनेछ ।

क्रुस खेल्नेमा शंका

टोली क्रुसले सोमबार बलसहित अभ्यास गरेका छन् । तर पनि उनी खेल्ने नखेल्ने अझै तय भइसकेको छैन । सम्भवत उनले खेल गुमाउने छन् । उनी नखेल्नुको अर्थ रियलको मिडफिल्डमा केहि असर भने पक्कै पर्नेछ । प्रतिबन्धका कारण कासिमेरो पनि दोस्रो लेगमा हुने छैनन् । त्यसअर्थ इडवार्डो कामाभिङा र फेडे भाल्भेर्डेले लुका मोड्रिचका साथ सुरुवात गर्ने सम्भावना छ । क्रुसको नखेलेको अवस्थामा मिडफिल्डको मुख्य जिम्मेवारी भने मोड्रिचको काँधमा हुनेछ ।

नाचो वा मार्सेलो

प्रतिबन्धका कारण फेर्लान्ड मेन्डीले पनि पिएसजीविरुद्धको खेल गुमाउने छन् । उनी नहुँदा इटालियन प्रशिक्षक कार्लो एन्सेलोटीले डेभिड अल्बालाई लेफ्ट ब्याकमा खेलाउने पक्षमा छैनन् । त्यसको अर्थ उनले नाचो फर्नान्डेज वा मार्सेलोलाई फ्रान्सेली डिफेन्डरको ठाँउमा खेलाउन सक्नेछन् । मेन्डीको ठाँउमा रियलकै एकेडेमीको उत्पादन नाचो खेल्ने सम्भावना बढी छ ।

राइट विङ्समा दुई विकल्प

भिनिसियस जुनियर र करिम बेन्जेमासँग आक्रमण साझेदारका रुपमा एन्सेलोटीले राइट विङ्सगमा मार्को एसेन्सियो वा रोड्रिगो गोजमध्ये एकलाई खेल्नउन सक्नेछन् । जारी सजनमा रोड्रिगो भन्दा गोलका लागि एसेन्सियो बढी प्रभावकारी देखिएका छन् । यद्दपी रोड्रिगोको सम्भावनालाई पनि पूर्ण रुपमा अस्विकार गर्न भने सकिन्न ।

दबाब बढाउने कोशिस

रियलले घरेलु मैदानमा पिएसजीमाथि दबाब बढाउन हससम्भव प्रयास पक्कै गर्नेछ । त्यसको अभ्यासका रुपमा रियलले रियल सोसिडाडविरुद्धको खेलको पहिलो हाफमा गरेको थियो । जसका कारण विपक्षी टोली रक्षात्मक खेल्न बाध्य भएको थियो । यद्दपी पिएसजीलाई सहज लिन पक्कै सकिन्न । पिएसजीसँग एमबाप्पे, लियोनल मेस्सी, नेयमार जस्ता सुपर स्टार खेलाडी छन् । जसले कुनै पनि बेला खेलको नतिजा आफ्नो पक्षमा पार्न भूमिका खेल्न सक्नेछन् ।

बेर्नाबेउको वातावरण

पिएसजीले पहिलो लेग घरेलु मैदानमा खेलेको थियो । फुटबलमा घरेलु मैदानका अर्थ रहने गर्छ । रियल समर्थकले घरेलु मैदानमा टोलीको प्रदर्शन शसक्त हुने अपेक्षा पक्कै राख्नेछन् । धेरैले पिएसजी र रियलबीचको प्रतिस्पर्धालाई फाइनल अघिको फाइनलका रुपमा पनि हेरेका छन् । यस्तोमा पिएसजी र रियलमध्ये जसले क्वार्टरफाइनलमा स्थान बनाएपनि दोस्रो लेगमा दुवै टोलीले सनसनीपूर्ण प्रदर्शन गर्ने अपेक्षा हुनेछ ।