काठमाडौं (हाम्रो खेलकुद) – झम्सिखेल युथ क्लबले सहिद स्मारक ‘बी’ डिभिजन लिगमा पहिलो जित दर्ता गर्ने क्रममा ब्वाइज युनियन क्लबमाथि सहज जित निकालेको छ । झम्सिखेलले ब्वाइज युनियनलाई ३–१ ले पराजित गरेको हो ।

सातदोबाटोस्थित एन्फा कम्प्लेक्सको मैदानमा मंगलबार भएको खेलमा झम्सिखेलको जितमा आकाश बहादुर राना, मनकुमार राई र अविरल रिजालले गोल गरे । ब्वाइज युनियनका विवेक राईले एक गोल फर्काए ।

खेलको १३औं मिनेटमा आकाशले गोल गर्दै झम्सिखेललाई सुरुवाती अग्रता दिलाए । १८औं मिनेटमा मन कुमार राईले गोल गर्दै झम्सिखेलको अग्रता दोब्बर पारे । ५८औं मिनेटमा अविरल रिजालले गोल गर्दै झम्सिखेललाई ३–० ले अघि बढाए । ६०औं मिनेटमा विवेक राईले गोल गर्दै खेललाई ३–१ को अवस्थामा ल्याएपनि त्यसपछि थप गोल निस्कन नसक्दा झम्सिखेलले पहिलो जित निकाल्न सफल भयो ।

जितसँगै झम्सिखेलको ३ खेलबाट ४ अंक पुगेको छ । झम्सिखेल पहिलो खेलमा टोखा श्री भगवतीसँग ३–१ ले पराजित हुँदा दोस्रो खेलमा सरस्वती युथ क्लबसँग १–१ गोलको बराबरी खेलेको थियो । पराजित ब्वाइज युनियनको ३ खेलबाट ३ अंक छ ।

मंगलबारकै अर्काे खेलमा सरस्वती युथ क्लब र टुसाल युथ क्लबले २–२ गोलको बराबरी खेल्दै अंक बाँडेका छन् । सरस्वतीका दिपेश श्रेष्ठ र विक्रम विशुंखेले गोल गर्दा टुसालका लागि दुवै गोल धिरेन्द्र बहादुर साहले गरेका थिए ।

आठौं मिनेटमा दिपेशको गोलबाट सरस्वतीले अग्रता लिएको थियो । ६०औं मिनेटमा धिरेन्द्रले बराबरी गोल फर्काए । ६१हमैं मिनेटमा विक्रमले गोल गर्दै सरस्वतीलाई पुन? २–१ को अग्रता दिलाए । तर, ७७औं मिनेटमा धिरेन्द्रले व्यक्तिगत र टोलीका लागि दोस्रो गोल गर्दै टुसलालाई हारबाट जोगाए । बराबरीसँगै सरस्वतीको ३ खेलबाट ५ अंक पुगेको छ । टुसालको ३ खेलबाट २ अंक पुगेको छ ।

यस्तै टोखा श्री भगवती र नयाँ बस्ती युथ क्लबले १–१ गोलको बराबरी खेल्दै अंक बाँडेका छन् । नयाँ बस्तीका रमेश तामाङले गोल गर्दा श्री भगवतीका रमेश उराउले बराबरी गोल फर्काए । १४औं मिनेटमा रमेश तामाङले गोल गर्दै नयाँ बस्तीलाई सुुरुवाती अग्रता दिलाए । ५०औं मिनेटमा रमेश उराउले बराबरी गोल फर्काए ।

यो बराबरीसँगै अपराजित रहेको श्री कुमारीले ३ खेलबाट ७ अंक जोडेको छ । अपराजित नै रहेको नयाँ बस्तीको तीन खेलबाट ३ अंक पुगेको छ । लिगमा १४ क्लबको सहभागिता रहेको छ । शीर्ष दुई टोली शीर्ष डिभिजनमा बढुवा हुनेछ । पुछारको दुई टोली रेलिगेसनमा पर्नेछन् ।