काठमाडौं (हाम्रो खेलकुद)– राष्ट्रिय फुटबल टोली तथा मछिन्द्र फुटबल क्लबका फरवार्ड मनीष डाँगी २३ दिनपछि मैदान फर्केका छन् । सहिद स्मारक ए डिभिजन लिगका दौरान माघ २९ गते गम्भिर घाइते भएका मनीष तीन सातापछि खेलमा उत्रेका हुन् ।

धनगढीमा जारी मुख्यमन्त्री सुदूरपश्चिम खप्तड गोल्ड कप फुटबल प्रतियोगितामा सर्लाहीको बागमती युवा क्लब विरुद्ध मंगलबारको क्वार्टरफाइनलमा मनीष पहिलो रोजाईमा खेलिरहेका छन् । ए डिभिजन लिग अन्तर्गत च्यासल युथ क्लबविरुद्धको खेलमा ६६ औं मिनेटमा बल नियन्त्रणका लागि जम्प गर्दा विपक्षी खेलाडीसँग ठोक्किएर मनीष मैदानमा ढलेका थिए ।

उक्त खेलमा ६१ औं मिनेटमा सुनिल बलको ठाँउमा मैदान प्रवेश गरेको ५ मिनेट पछि नै मनिष घाइते भएका थिए । बल नियन्त्रणमा लिने प्रयासमा विपक्षी खेलाडी यान्निक केट्चासँग ठोक्किदा मनीष टाउकोमा चोट लागेर मैदानमा ढलेका थिए । उनी झण्डै ६ मिनेट अचेत भएका थिए । च्यासलका खेलाडी, फिजियो सुरज भुसाल, एन्फाकी फिजियो नविना श्रेष्ठलगायतको प्रयासपछि उनको होस खुलेको थियो ।

त्यसपछि उनलाई उपचारका लागि ब्लुक्रस अस्पताल लगिएको थियो । उनले ४ दिन अस्पतालमा बिताएका थिए । फागुन १४ गते लिगको समापनमा मछिन्द्रले उपाधि जित्दा मनिष दर्शकदीर्घामा रहेका थिए । उनी समापन समरोह तथा टोलीको उपाधि र्यालीमा भने सहभागी भएका थिए । टोलीले लिग सफलता उनैलाई समपर्ण गरेको थियो ।

मनीषको टाउकोमा गम्भीर कुनै चोट नदेखिएको र स्वास्थ्यकर्मीको सल्लाह अनुसार नै उनी मैदान फर्केका हुन् । उनी नेपाल सुपर लिग (एनएसएल) अक्सनमा पनि विराटनगर सिटी फुटबल क्लबमा पुगेका छन् । गत सिजन ट्यालेन्ट हन्टबाट टोलीमा रहेका उनलाई यसपटक अक्सनमा १ लाख ५० हजार खर्चेर विराटनगरले अनुबन्ध गरेको हो ।

१० टोलीको सहभागिता रहने एनएसएलको दोस्रो संस्करण चैत २६ गते देखि सुरु हुँदैछ । पहिलो संस्करणमा ७ टोलीको सहभागिता रहेको एनएसएलको उपाधि काठमाडौं रेजर्सले जितेको थियो ।