हिमाल खरेल, झापा

विभागीय टोली नेपाल एपिएफ क्लबलाई पराजित गर्दै सातदोबाटो युथ क्लब झापा गोल्ड कपको पाँचौं संस्करणको सेमिफाइनलमा प्रवेश गरेको छ । एपिएफलाई २–१ ले पराजित गर्दै सातदोबाटोले अन्तिम चारमा स्थान बनाएको हो ।

बिर्तामोडस्थित डोमालाल राजवंशी रंगशालामा सोमबार भएको पहिलो क्वार्टर फाइनल खेलमा सातदोबाटोको जितका लागि खेलको ८२ औं मिनेटमा सुशील राईले गोल गरे । उनले पेनाल्टी क्षेत्रको ठिक भित्रबाट गरेको सशक्त प्रहारलाई जापानी गोलरक्षक युया कुरियामाले बचाउने कुनै अवसर पाएनन् ।

लगत्तै ८५ औं मिनेटमा नीरज चौधरीले सातदोबाटोको अग्रतालाई दोब्बर बनाए । निरजले पेनाल्टी क्षेत्र बाहिरबाट गरेको प्रहारमा गोलरक्षक युया पुन एकपटक निरिह बने । खेलको अन्तिम समयमा एपिएफले गोल फर्कायो । इन्ज्युरी समयमा दिपेश धिमालले गोल फर्काएपनि उक्त गोल सान्तवनामा सिमित भयो ।

त्यसअघि खेलको पहिलो हाफ बराबरीमा टुंगिएको थियो । खेलको छैटौं मिनेटमा एपिएफका युवराज खड्काले डिबक्सभित्र पाएको बललाई पोस्टतर्फ प्रहार गर्न सकेनन् । १३ औं मिनेटमा सातदोबाटोका प्रशान्त अवस्थीको कर्नर प्रहारमा आकाश बुढा मगरले गरेको क्रसर एपिएफका गोलरक्षक युयाले बचाउ गरे । २१ औं मिनेटमा एपिएफका अर्मोड बेडमले डिबक्सभित्रबाट गरेको प्रहार सातदोबाटोका मार्टिन सिलोले बचाउ गरे ।

दोस्रो हाफमा खेल थप प्रतिस्पर्धात्मक बन्यो । ४६ औं मिनेटमा सातदोबाटोका सुशील राईले गरेको प्रहार विपक्षी गोलरक्षकले सहजै समाते । ५५ औं मिनेटमा एपिएफका अर्मान्ड बेडमको क्रस कप्तान नवीन लामाले मिस गरे । ७४ औं मिनेटमा एपिएफका युवराज खड्काको हेडर पास्ट नजिकैबाट बाहिरियो ।

यस जितसँगै सातदोबाटो क्लब पाँचौ संस्करणको नेपाल आइस झापा गोल्डकपको सेमिफाइनलमा पुगेको छ । सातदोबाटोको जितमा पहिलो गोल गर्ने सुशील राई सोमबारको खेलको म्यान अफ द म्याच भए । उनले नगद ९ हजार ९९९ रुपैयाँ प्राप्त गरे ।

मंगलबार अर्को क्वार्टरफाइनल खेल संकटा क्लब र थ्री स्टर क्लबबीच हुने आयोजक समितिका महासचिव गजेन्द्रबहादुर पौडेलले बताए । संकटाले नेपाल पुलिस क्लबलाई पराजित गर्दै क्वार्टरफाइनलमा प्रवेश गरेको हो भने थ्री स्टारले सोझै क्वार्टरफाइनलमा स्थान बनाएको हो ।