एजेन्सी – इंग्लिस फुटबलकै बहुप्रतिक्षित खेल, म्यानचेस्टर डर्बीअघि म्यानचेस्टर युनाइटेडलाई ठुलो धक्का लागेको छ । क्लबका स्टार फरवार्ड क्रिस्टियानो रोनाल्डो चोटका कारण आइतबार हुने खेलमा अनुपस्थित रहने भएका छन् ।

यस सिजन युनाइटेडका लागि ३० खेलमा १५ गोल गर्दै सर्वाधिक गोलकर्ता रहेका रोनाल्डोले आज हुने खेल चोटका कारण गुमाउने भएका हुन् । द एथ्लेटिकका अनुसार रोनाल्डोसँगै क्लबका अर्का फरवार्ड एडिन्सन काभानी पनि चोटकै कारण बाहिर रहनेछन् । दुइ अनुभवी खेलाडी नहुँदा युनाइटेडको अग्रपंक्तिमा समस्या देखिएको छ । अब युवा फरवार्ड मार्कस रासफर्डले आक्रमण सम्हाल्ने सम्भावना रहेको छ ।

रोनाल्डोले पछिल्लो केहि समय भने अपेक्षित प्रदर्शन गर्न सकेका छैनन् । सन् २०२२ लागेयता उनले क्लबका लागि १ गोल मात्र गरेका छन् । पछिल्लो १० खेलमध्य उनले वेस्ट ब्रोमविरुद्ध २-० जितमा गरेको एकमात्र गोल हो ।

युनाइटेडले सिटीविरुद्ध हुने महत्त्वपूर्ण खेलमा यसै सिजन रियल म्याड्रिडबाट आएका डिफेन्डर राफाएल भारान र लेफ्ट ब्याक लुक शाको पनि साथ पाउने छैन । दुवै सामान्य चोटका कारण बाहिर रहने अनुमान रहेको छ ।

युनाइटेड लिग तालिकामा चौथो स्थानमा रहेको छ । तर आर्सनल ३ खेल कम खेल्दै २ अंकले पछि छ । युनाइटेडको ४७ अंक रहँदा वेस्ट ह्याम र आर्सनलको समान ४५ अंक छ । सिटी ६६ अंकसहित शीर्ष स्थानमा छ ।