एजेन्सी – जर्मन विंगर फरवार्ड काई हाभर्टज चम्कदा लन्डन क्लब चेल्सीले इंग्लिस प्रिमियर लिगमा सानदार जित दर्ता गरेको छ । चेल्सीले बर्नलेलाई उसकै मैदानमा ४–० ले पराजित गरेको हो ।

चेल्सीको जितमा काई हाभर्टजले दुई गोल गर्दा रिस जेम्स र क्रिस्टियन पुलिसिसले समान एक गोल गरे । सबै चार गोल दोस्रो हाफमा भएको थियो । टर्फ मुरमा शनिबार राति भएको खेलमा चेल्सीले घरेलु टोली बर्नलेलाई दवावमा राखेपनि गोलको लागि दोस्रो हाफ नै कुर्नुपरेको थियो ।

४७औं मिनेटमा रिस जेम्सले गोल गर्दै चेल्सीको गोलको खाता खोले । उनले ट्रिभो चलोवाहको पासमा गोल गर्न सफल भएका थिए । ५२औं मिनेटमा काई हाभर्टजले गोल गर्दै चेल्सीको अग्रताद दोब्बर पारे । उनले क्रिस्टियन पुलिसिसको पासलाई सदुपयोग गरेका थिए ।

त्यसको तीन मिनेटपछि ५५औं मिनेटमा काईले व्यक्तिगत दोस्रो तथा टोलीका लागि तेस्रो गोल गर्दै चेल्सीलाई सहज जिततर्फ अघि बढाए । उनले यसपटक रिस जेम्सको पासलाई सदुपयोग गरेका थिए । ६९औं मिनेटमा क्रिस्टियन पुलिसिसले गोल गर्दै चेल्सीलाई फराकिलो जित दिलाए । जर्गिन्होको प्रयास ब्लक हुदा पुलिसिसले क्लोज रेन्जबाट सहजै फिनिस गरेका थिए ।

यो जितसँगै चेल्सीले शीर्ष तीनमा बलियो पकड बनाएको छ । तेस्रो स्थानमा रहेको चेल्सीको ३६ खेलबाट ५३ अंक रहेको छ । एक खेल बढी खेलेको म्यानचेस्टर युनाइटेडको ४७ अंक छ । पराजित बर्नले २६ खेलबाट २१ अंक जोडेर रेलिगेसन जोनको १८औं स्थानमा रहेको छ ।

अन्य नतिजा

लेस्टरविरुद्ध लिड्स (१–०), एस्टन भिल्लाविरुद्ध साउथह्याम्टन (४–०), न्यूक्यासलविरुद्ध ब्राइटन (२–१), नर्विचविरुद्ध ब्रेन्टफर्ड (१–३) र वल्भ्सविरुद्ध क्रिस्टल प्यालेस (०–२)