काठमाडौं (हाम्रो खेलकुद)– खेलको अन्त्य तिर दुई गोल गर्दै मनाङ मस्र्याङ्दी क्लबले पाँचौं मुख्यमन्त्री सुदूरपश्चिम खप्तड गोल्ड कप फुटबल प्रतियोगितामा विजयी सुरुवात गरेको छ ।

धनगढी रंगशालामा बिहीबार भएको उद्घाटन खेलमा मनाङले भारतको दिल्ली फुटबल क्लबलाई २–१ ले हराउँदै विजयी गोल गरेको हो ।
अन्जन विष्टले बराबरी र विमल रानाले विजयी गोल गरेपछि मनाङले पाहुना टोलीमाथि जित निकालेको हो । कृष्णको गोलबाट दिल्लीले अग्रता लिएपनि त्यसलाई जोगाउन सकेन ।

३ मिनेटको फरकमा मनाङले नतिजा उल्टाएको थियो । ८२ औं मिनेटमा अन्जले बराबरी गोल फर्काएका थिए । त्यस्तै परिवर्तित खेलाडी विमलले ८५ औं मिनेटमा गरेको गोल खेलको निर्णायक बन्यो । त्यसअघि ७१ औं मिनेटमा कृष्णको गोलबाट दिल्लीले अग्रता लिएको थियो ।
सुदूरपरिश्चम ११ स्पोर्टस क्लब धनगढीको आयोजनामा सुरु भएको प्रतियोगितामा १० टोलीको सहभागिता रहेको छ ।

जसमा उद्घाट खेलका दुई टोलीबाहेक लिग च्याम्पियन मछिन्द्र फुटबल क्लब, एनआरटी आयोजक, हिमालयन शेर्पा, एनजेजेवाइसी फुटबल क्लब, फ्रेन्ड्स क्लब, बागमती युथ क्लब, एभेनिर फुटबल क्लब रहेका छन् । प्रतियोगितामा शुक्रबार एनआरटी र बागमतीबीच प्रतिस्पर्धा हुनेछ । प्रतियोगिताको विजेताले २१ लाख र दोस्रो हुने टोलीले १० लाख रुपैयाँ प्राप्त गर्नेछ ।