काठमाडौं (हाम्रो खेलकुद) – नेपाल सुपर लिग (एनएसएल) का लागि बुटवल लुम्बिनी फुटबल क्लबले गोलरक्षक विशाल श्रेष्ठलाई नै मार्की खेलाडीमा निरन्तरता दिएको छ ।

क्लबले आफ्नो वेबसाइटमार्फत प्रशिक्षकमा भने परिवर्तन गर्दै नेपाल पुलिस क्लबमा अनन्त थापालाई नियुक्त गरेको जनाएको छ । बुटवलले गत सिजन प्रशिक्षकमा सनोज श्रेष्ठलाई नियुक्त गरेको थियो । क्लबको जनरल म्यानेजरमा राजुकाजी शाक्य नै नियमित रहेका छन् । राष्ट्रिय टोलीका खेलाडी तथा गत सिजन लुम्बिनीबाट नै खेलेका डिफेन्डर रविन श्रेष्ठ भने टोलीमा व्यवस्थापकका रुपमा रहेका छन् ।

टोलीमा यसपटक पनि मार्की खेलाडीमा विशाल श्रेष्ठ नै निरन्तर रहेका छन् । उनले गत सिजन टोलीको कप्तानी पनि सम्हालेका थिए । लुम्बिनीले सुरज विक घाइते भएपछि उनको स्थानमा त्यसबेला राष्ट्रिय टोलीका कप्तान रहेका विराज महर्जनलाई अनुबन्ध गरेको थियो । विशालले लिग चल्दै गर्दा विराजलाई कप्तानीको जिम्मेवारी हस्तान्तरण गरेका थिए ।

क्लबले गत सिजन अंक तालिकाको चौथो स्थानमा रहँदै प्लेअफ यात्रा तय गरेको थियो । प्लेअफमा ललितपुरसँग पराजित भएपछि टोली समग्रमा चौथो स्थानमा सिमित भएको थियो ।

नेपाल स्पोर्टस् एण्ड इभेन्ट म्यानेजमेन्ट (एनइएसएम) को आयोजनामा चैत २६ गतेबाट सुरु हुने भनिएको एनएसएलको दोस्रो संस्करणमा यसपटक ३ नयाँ टोली थपिएपछि कुल १० टोलीबीच प्रतिस्पर्धा हुनेछ । आयोजकले शुक्रबार खेलाडी अक्सन गर्ने जनाएको छ । अक्सनका लागि अखिल नेपाल फुटबल संघ (एन्फा) ले २ सय ४२ खेलाडीलाई तीन क्याटगोरीमा विभाजन गरेको छ ।

विहीबार काठमाडौं रेजर्सले विकेश कुथुलाई मार्की खेलाडी र बालगोपाल महर्जनलाई प्रशिक्षकमा निरन्तरता दिएको छ । विराटनगर सिटीले मार्की खेलाडीमा रञ्‍जित धिमाललाई निरन्तरता दिँदा प्रशिक्षकमा विष्णु गुरुङलाई नियुक्त गरेको छ । झापा फुटबल क्लबले अन्जन विष्टलाई मार्की खेलाडीको रुपमा अघिल्लो साता नै सार्वजनिक गरिसकेको छ । चितवनले प्रशिक्षण टोलीमा तोपे फुजा, याम गुरुङ र शैलेश कर्मचार्यलाई नियुक्त गरेको छ ।

एनएसएलमा धनगढी, विराटनगर, काठमाडौं रेजर्स, झापा, पोखरासहित ललितपुर सिटी एफसी, एफसी चितवन, बुटवल लुम्बिनी एफसी र तीन नयाँ टोली झापा एफसी, वीरगञ्ज युनाइटेड र स्पोर्टिङ इलाम डि मेची छन् । यसपटक एनएसएल पोखरा र काठमाडौंमा हुने बताइएको छ ।