काठमाडौं (हाम्रो खेलकुद)– नेपाल सुपर लिग (एनएसएल) टोली एफसी चितवनले प्रशिक्षण टोलीमा तोपे फुजा र याम गुरुङलाई नियुक्त गरेको छ ।

मनाङ मर्स्याङ्दी क्लबका मुख्य प्रशिक्षक फुजालाई चितवनले प्राविधिक निर्देशक र बुटवलका याम गुरुङलाई मुख्य प्रशिक्षक नियुक्त गरेको क्लबका मालिक सचिन ढकालले जानकारी दिए । टोलीले शैलेश कर्माचार्यलाई सहायक प्रशिक्षकका रुपमा निरन्तरता दिएको छ ।

चितवनले एनएसएलको पहिलो संस्करणमा मेघराज केसीलाई मुख्य प्रशिक्षक र त्रिभुवन आर्मी फुटबल क्लबका कप्तान भरत खवासलाई मार्की खेलाडी नियुक्त गरेको थियो । चितवनले यसपटक मार्की खेलाडी भने केहि दिन पछि सार्वजनिक गर्ने ढकालले बताए । चितवनको पहिलो संस्करण भने सन्तोषजनक हुन सकेको थिएन ।

फुजाको नेतृत्वमा यसपटक मनाङले लिगमा पाँचौ स्थान प्राप्त गरेको थियो । मनाङलाई लिग समेत जिताइसकेका फुजाले त्यसअघि मछिन्द्र फुटबल क्लबलाई प्रशिक्षण दिएका थिए ।

नेपाल स्पोर्टस् एण्ड इभेन्ट म्यानेजमेन्ट (एनइएसएम) को आयोजनामा चैत २६ गतेबाट सुरु हुने भनिएको एनएसएलको दोस्रो संस्करणमा यसपटक ३ नयाँ टोली थपिएपछि कुल १० टोलीबीच प्रतिस्पर्धा हुनेछ । आयोजकले शुक्रबार खेलाडी अक्सन गर्ने जनाएको छ । अक्सनका लागि अखिल नेपाल फुटबल संघ (एन्फा) ले २ सय ४२ खेलाडीलाई तीन क्याटगोरीमा विभाजन गरेको छ ।

विहीबार काठमाडौं रेजर्सले विकेश कुथुलाई मार्की खेलाडी र बालगोपाल महर्जनलाई प्रशिक्षकमा निरन्तरता दिएको छ । विराटनगर सिटीले मार्की खेलाडीमा रञ्‍जित धिमाललाई निरन्तरता दिँदा प्रशिक्षकमा विष्णु गुरुङलाई नियुक्त गरेको छ । झापा फुटबल क्लबले अन्जन विष्टलाई मार्की खेलाडीको रुपमा अघिल्लो साता नै सार्वजनिक गरिसकेको छ ।

एनएसएलमा धनगढी, विराटनगर, काठमाडौं रेजर्स, झापा, पोखरासहित ललितपुर सिटी एफसी, एफसी चितवन, बुटवल लुम्बिनी एफसी र तीन नयाँ टोली झापा एफसी, वीरगञ्ज युनाइटेड र स्पोर्टिङ इलाम डि मेची छन् । यसपटक एनएसएल पोखरा र काठमाडौंमा हुने बताइएको छ ।