काठमाडौं (हाम्रो खेलकुद) – आशिष चापागाईको ह्याट्रिक सहयोगमा चर्च ब्वाइज युनाइटेडले सहिद स्मारक ‘बी’ डिभिजन लिगमा सानदार विजयी सुरुवात गरेको छ ।

सातदोबाटोस्थित एन्फा कम्प्लेक्सको मैदानमा बिहीबार भएको खेलमा चर्च ब्वाइजले टुसाल युथ क्लबमाथि ५–२ को फराकिलो जित निकालेको हो । चर्च ब्वाइजको जितमा आशिषले ह्याट्रिक पूरा गर्दा बिकास राई र कुवेर न्यौपानेले समान एक गोल गरे । टुसालका गिलेप्सी जंग कार्की र उत्तम शाहीले समान एक गोल फर्काए ।

चर्च ब्वाइजले पहिलो हाफमा चार गोल गर्दा दोस्रो हाफमा एक गोल थप्दा दुई गोल बेहोरेको थियो । छैटौं मिनेटमा आशिषको गोलबाट चर्च ब्वाइजले सुरुवाती अग्रता लिन सफल भयो । १७औं मिनेटमा आशिषले गोल गर्दै चर्च ब्वाइजको अग्रता दोब्बर पारे ।

२१औं मनिेटमा बिकास राईले गोल गरेपछि चर्च ब्वाइज ३–० ले अघि बढ्यो । ३३औं मिनेटमा आशिषले ह्याट्रिक पुरा गर्दा चर्च ब्वाइज पहिलो हाफमा ४–० ले अघि बढ्यो । जारी ‘बी’ डिभिजनमा यो पहिलो ह्याट्रिक हो ।

७२औं मिनेटमा गिलेप्प्सी जंग कार्कीले गोल गर्दै खेललाई ४–१ को अवस्थामा ल्याए । ८६औं मिनेटमा सब्सिच्युट कुवेर न्यौपानेले गोल गर्दै चर्च ब्वाइजलाई ५–१ ले अघि बढाए । कुवेर ४६औं मिनेटमा सनम भुजेलको स्थानमा मैदान छिरेका थिए ।

८९औं मिनेटमा सब्सिच्युट उत्तम शाहीले मैदान प्रवेश गरेको पहिलो मिनेटमा गोल गर्दै खेललाई ५–२ को स्थितिमा ल्याएपनि त्यसपछि थप गोल निस्कन नसक्दा चर्च ब्वाइज विजयी हुन सफल भयो ।

यसअघि बुधबार श्री भगवती क्लब, ब्वाइज युनियन क्लब र सरस्वती युथ क्लबले सहिद स्मारक ‘बी’ डिभिजन लिगमा विजयी सुरुवात गरिसकेका छन् । लिगमा १४ क्लबको सहभागिता रहेको छ ।