काठमाडौं (हाम्रो खेलकुद)– ए डिभिजन लिग क्लबको प्रशिक्षकका रुपमा यसै सिजन डेब्यू गरेका विष्णु गुरुङले नेपाल सुपर लिग (एनएसएल) को विराटनगर सिटी एफसीको कमान सम्हाल्ने भएका छन् ।

विराटनगरले बिहीबार प्रेस विज्ञप्तीमार्फत गुरुङलाई मुख्य प्रशिक्षक नियुक्त गरेको जनाएको छ । विराटनगरले गत सिजन भारतीय प्रशिक्षक यान ललाई मुख्य प्रशिक्षक नियुक्त गरेको थियो । गत साता सम्पन्न सहिद स्मारक ए डिभिजन लिगमा गुरुङको नेतृत्वमा रहेको संकटा क्लबले अंकतालिकामा सातौं स्थान हासिल गरेको थियो ।

सहारा एकेडेमीको पहिलो ब्याचका खेलाडीका रुपमा फुटबलमा अघि बढेका गुरुङले पछि एकेडेमीकै प्रशिक्षकका रुपमा नयाँ यात्रा सुरु गरेका थिए । थ्री स्टार र संकटाका पूर्व खेलाडी समेत रहेका उनी एएफसी ए लाइसेन्स प्राप्त प्रशिक्षक हुन् ।

सी लाइसेन्स लिइसकेपछि बनेपा ब्वाइज क्लब (बिबिसी) को सी डिभिजन छनोट, आइडिएल कपमा कलेज टोली हुँदै ललित स्मृतिमा थ्री स्टारको युवा टोलीलाई प्रशिक्षण दिएका थिए । सी लिएको केहि समयमै एसियाली फुटबल महासंघ (एएफसी) ले उनलाई बी लाइसेन्स कोर्षका लागि छनोट गर्यो । उनले राष्ट्रिय फुटसल टोलीको मुख्य प्रशिक्षकको जिम्मेवारी पनि निर्वाह गरे । छोटो अवधिमै उनले राष्ट्रिय टोली तयार पारेर एसियन कप छनोटमा टोलीको प्रशिक्षण सम्हाले ।

बी लाइसेन्स प्राप्त गरेपछि भने उनी प्रशिक्षकका रुपमा सहारा फर्किए । सहारामा हुँदा हुँदै संकटाले उनले लिगका लागि प्रशिक्षकमा नियुक्त गरेको थियो । सहारामा हुँदा हुँदै यो वर्ष उनले दुई वटा अर्को जिम्मेवारी पनि पूरा गरे । आफै समेत सेयर होल्डर रहेको स्पोर्ट्स कासललाई गुरुङले असोजमा पहिलो ए डिभजन लिग फुटसल च्याम्पियन बनाए । त्यसको केहि दिनपछि आरसी ३२ टोलीलाई सी डिभिजनमा छनोट गराउनमा पनि उनको भूमिका रहेको थियो ।

नेपाल स्पोर्टस् एण्ड इभेन्ट म्यानेजमेन्ट (एनइएसएम)को आयोजनामा चैत २६ गतेबाट सुरु हुने भनिएको एनएसएलको दोस्रो संस्करणमा यसपटक ३ नयाँ टिम थपिएपछि कुल १० टिमले प्रतिस्पर्धा गर्ने यसअघि नै पत्रकार सम्मेलनमार्फत जानकारी गराइएको थियो । आयोजकले शुक्रबार खेलाडी अक्सन गर्ने जनाएको छ । अक्सनका लागि २ सय ४२ खेलाडीलाई तीन क्याटगोरीमा विभाजन गरिएको छ ।

एनएसएलमा धनगढीसहित विराटनगर सिटी फुटबल क्लब, काठमाडौं रेजर्स, ललितपुर सिटी एफसी, एफसी चितवन, पोखरा थण्डर्स, बुटवल लुम्बिनी एफसी र तीन नयाँ टोली झापा एफसी, वीरगञ्ज युनाइटेड र स्पोर्टिङ इलाम डि मेची रहेका छन् । यसपटक एनएसएल पोखरा र काठमाडौंमा हुने भनिएको छ ।