काठमाडौं (हाम्रो खेलकुद) – धनगढी एफसीले नेपाल सुपर लिग (एनएसएल) को दोस्रो संस्करणका लागि राष्ट्रिय टोलीका मिडफिल्डर विशाल राईलाई नै मार्की खेलाडीमा निरन्तरता दिएको छ ।

साविक उपविजेता धनगढीले बुधबार दोस्रो संस्करणको एनएसएलको लागि विशाललाई नै मार्की खेलाडीमा निरन्तरता दिएको जनाएको छ । क्लबले सामाजिक संजालमार्फत विशाललाई अनुबन्ध गरेको जानकारी दिएको हो । एनएसएल चैत २६ बाट शुरु हुने तालिका छ ।

धनगढी गत वर्ष फाइनलमा काठमाडौं रेजर्ससँग पराजित हुँदै उपविजेता बनेको थियो । मच्छिन्द्र फुटबल क्लबले लगातार दोस्रोपटक ए डिभिजन लिगको उपाधि जित्दा विशाल टोलीका महत्त्वपूर्ण सदस्य रहेका थिए । उनले वैवाहिक सम्बन्धमा बाँधिने भएपछि लिगको अन्त्यतिर केहि खेल गुमाएका थिए ।

यस्तै झापा एफसीले राष्ट्रिय टोलीका फरवार्ड अन्जन विष्टलाई मार्की खेलाडीको रुपमा सार्वजनिक गरिसकेको छ । अन्य ८ टोलीले भने मार्की खेलाडी सार्वजनिक गर्ने तयारी गरिरहेका छन् ।

नेपाल स्पोर्टस् एण्ड इभेन्ट म्यानेजमेन्ट (एनइएसएम)को आयोजनामा हुने एनएसएलमा यसपटक ३ नयाँ टिम थपिएपछि कूल १० टिमले प्रतिस्पर्धा गर्नेछन् । आयोजकले शुक्रबार अक्सन गर्ने जनाएको छ । अक्सनका लागि २४२ खेलाडीलाई तीन क्याटगोरीमा विभाजन गरिएको छ । मार्कीका लागि तोकिएका खेलाडी मार्की खेलाडी नबनेको अवस्थामा उनी अक्सनमा जानेछन् ।

एनएसएलमा धनगढीसहित विराटनगर सिटी फुटबल क्लब, काठमाडौं रेजर्स, ललितपुर सिटी एफसी, एफसी चितवन, पोखरा थण्डर्स, बुटवल लुम्बिनी एफसी र तीन नयाँ टोली झापा एफसी, वीरगञ्ज युनाइटेड र स्पोर्टिङ इलाम डि मेची रहेका छन् ।

यो पनि :

एनएसएल अक्सनका लागि खेलाडी सुची सार्वजनिक