काठमाडौं (हाम्रो खेलकुद) – श्री भगवती क्लब, ब्वाइज युनियन क्लब र सरस्वती युथ क्लबले सहिद स्मारक ‘बी’ डिभिजन लिगमा विजयी सुरुवात गरेका छन् ।

सातदोबाटोस्थित एन्फा कम्प्लेक्सको खेल मैदानमा बुधबार भएको खेलमा श्री भगवतीले झम्सीखेल युथ क्लबलाई ३–१ ले पराजित गर्दै विजयी सुरुवात गरेको हो । श्री भगवतीको जितमा अनिल गुरुङ, रमेश उरव र मिलान खड्काले गोल गरे । झम्सीखेलका मन कुमार राईले एक गोल फर्काए । खेलको २४औं मिनेटमा अनिल गुरुङको गोलबाट श्री भगवतीले सुरुवाती अग्रता लिएको थियो । ३७औं मिनेटमा मन कुमार राईले गोल गर्दै खेललाई पहिलो हाफमा १–१ गोलको बराबरीमा ल्याए ।

५०औं मिनेटमा रमेश उरवले गोल गर्दै श्री भगवतीलाई २–१ को अग्रता दिलाए । ६३औं मिनेटमा मिलान खड्काले गोल गर्दै श्री भगवतीको जित पक्का गरे । त्यसपछि खेलमा श्री भगवतीले थप आक्रमण बुनेपनि गोल थप्न सकेन ।

अर्काे खेलमा गत सिजन ए डिभिजनबाट रेलिगेसनमा परेको सरस्वती युथ क्लबले एक गोलले पछि परेको स्थिति उल्ट्याएर बाँसबारी क्लबमाथि ३–१ को जित निकालेको छ । सरस्वतीको जितमा विक्रम विसुंखे, श्रीजल लामा र भुपेन्द्र शाहीले गोल गरे । बाँसबारीका विके राईको गोल सान्त्वना बन्यो । खेलको छैटौं मिनेटमा विके राईको गोलबाट बाँसबारीले सुरुवाती अग्रता लिएको थियो । तर, त्यो अग्रतालाई बाँसबाबरीले जोगाउन सकेन ।

२०औं मिनेटमा विक्रम विसुंखेले गोल गर्दै खेललाई १–१ गोलको बराबरीमा ल्याए । बराबरीतर्फ धकेलिएको खेलको अन्त्यतिर सरस्वतीले दुई गोल गर्दै टोलीको जित पक्का गरे । ८७औं मिनेटमा श्रीजल लामाले गोल गर्दै सरस्वतीलाई २–१ ले अघि बढाए । इन्ज्युरी समयको थप गरिएको चौथो मिनेटमा भुपेन्द्र शाहीले गोल गर्दै सरस्वतीको जित पक्का गरे ।

दिनको अन्तिम खेलमा ब्वाइज युनियन क्लबले बीरगंज युनाइटेडलाई १-० ले पराजित गर्यो । खेलको ६४ औं मिनेटमा मिलन लिम्बुले गरेको गोल नै ब्वाइज युनियनको जितमा निर्णायक बन्यो ।

प्रतियोगिता अन्तर्गत विहीबार पनि तीन खेल हुनेछ । विहान ९:३० बजे चर्च ब्वाइज युनाइटेड र टुसाल युवा क्लब, दोस्रो खेलमा मध्यान्ह १२:४५ बजे श्री कुमारी क्लब र नयाँबस्ती युवा क्लब तथा अन्तिम खेलमा दिउँसो ४ बजे रानीपोखरी कर्नर टिम (आरसिटी) र खुमलटार युवा क्लब भिड्नेछन् । लिगमा १४ क्लबको सहभागिता रहेको छ ।