काठमाडौं (हाम्रो खेलकुद) – नेपाल सुपर लिग (एनएसएल) को नयाँ टोली झापा फुटबल क्लबले राष्ट्रिय फुटबल टोलीका फरवार्ड अन्जन विष्टलाई मार्की खेलाडीको रुपमा अनुबन्ध गरेको छ ।

आइतबार एक कार्यक्रममाझ झापा एफसीले यस सिजनका लागि अन्जनलाई अनुबन्ध गरेको हो । झापाले एनएसएलको गत सिजन मार्की खेलाडीले प्राप्त गरेको भन्दा बढी रकममा अनुबन्ध गरेको जानकारी दियो । सम्झौता पत्रमा क्लबका महासचिव सुजन गौतम र अन्जनविष्टले हस्ताक्षर गरे । गौतमले अन्जन नेपाली फुटबलका उत्कृष्ट खेलाडी भएकाले अनुबन्ध गरेको बताए ।

‘हामीले झापाको क्लब भएका कारण पनि झापाली खेलाडी अनुबन्ध गर्ने सोचमा थियौं । तर अन्जन नेपाली फुटबलका स्टार खेलाडी हुन् । हामी उनलाई टिममा अनुबन्ध गर्न पाउँदा निकै खुसी छौं,’ उनले भने, ‘हाम्रो ध्यान नेपाली फुटबल विकास गर्ने नै हो । अक्सनमा हामी झापाली खेलाडीलाई प्राथमिकतामा राख्ने छौं ।’

अन्जनले पनि क्लबको सोचबाट प्रभावित भएर नै अनुबन्ध गर्ने निर्णय लिएको बताए । ‘मैले क्लबसँग कुरा गर्दा निकै सकारात्मक रहेको पाएँ । यहाँ केहि विशेष वातावरण छ जस्तो लागेको छ । अब एकसाथ मिलेर बलियो टोली निर्माण गर्नेछौं । मैले आफूले सकेको योगदान यहाँ दिनेछु,’ अन्जनले भने ।

झापा एफसीले यसअघि सी डिभिजन छनोटमा पनि प्रतिस्पर्धा गरेको थियो । एनएसएलमा यस सिजन थपिएको तीन टोलीमध्यको झापा मार्की खेलाडी सार्वजनिक गर्ने पहिलो क्लब हो । झापाले प्रशिक्षकबारे पनि चाडै जानकारी दिने बताएको छ ।

एनएसएलको आयोजक नेपाल स्पोर्ट्स एन्ड इभेन्ट म्यानेजेमेन्ट (एनएसइएम) ले गत महिना प्रेस विज्ञप्ति जारी गर्दै एनएसएलको दोस्रो संस्करण चैत २६, २०७८ देखि जेठ ७, २०७९ सम्म आयोजना हुने जनाएको थियो । आयोजकले पछिल्लो संस्करणको ७ टोलीबाट थप ३ टोलीका साथ कुल १० टोलीले प्रतिस्पर्धा गर्ने जनाएको छ । यसपटक पहिलो चरण पोखरा र दोस्रो चरण काठमाडौंमा हुने आयोजकले जनाएको छ ।

यो पनि : राष्ट्रिय टोलीको योजनामा असर गर्ने एनएसएलबारे एन्फा अनभिज्ञ