एजेन्सी – डुसान भ्लाहोभिचको दुई गोलमा युभेन्ट्सले इटालियन सिरी ‘ए’ मा रोमाञ्चक जित निकालेको छ । युभेन्ट्सले घरेलु टोली इम्पोलीलाई ३–२ ले पराजित गरेको हो ।

युभेन्ट्सको जितमा डुसान भ्लाहोभिचले दुई गोल गर्दा मोइस किनले एक गोल थपे । घरेलु टोलीका जाइमन जुर्काेवस्की र एन्ड्रिया ला मान्टियाले गोल गरेपनि टोलीको हार टार्न सकेन ।

इम्पोलीमा शनिबार राति भएको खेलको ३२औं मिनेटमा मोइस किनको गोलबाट पाहुना टोली युभेन्ट्सले सुरुवाती अग्रता लिएको थियो । उनले एड्रिएन राविओटको पासमा गोल गर्न सफल भएका थिए ।

४०औं मिनेटमा जाइमनले गोल गर्दै खेललाई १–१ गोलको बराबरीमा ल्याए । पहिलो हाफको इन्ज्युरी समयको थप गरिएको दोस्रो मिनेटमा डुािन भ्लाहोभिचले जुआन कोर्डाडोको पासमा गोल गरेपछि युभेन्ट्स पहिलो हाफमा २–१ ले अघि बढ्यो ।

६६औं मिनेटमा डुसानले व्यक्तिगत दोस्रो तथा टोलीका लागि तेस्रो गोल गरेपछि युभेन्ट्स सहज जिततर्फ अग्रसर बन्यो । उनले अल्भारो मोराटाको पासमा गोल गर्न सफल भएका थिए । ७६औं मिनेटमा घरेलु टोलीका एन्ड्रिया ला मान्टियाले गोल गर्दै खेललाई ३–२ को स्थितिमा ल्याएपनि त्यसपछि थप गोल निस्कन नसक्दा युभेन्ट्सले महत्वपूर्ण जित निकाल्न सफल भयो ।

यो जितसँगै युभेन्ट्सले तेस्रो स्थानको नेपोलीसँग अंक दुरी छोट्याउँदै शीर्ष चारमा यथावत रहेको छ । युभेन्ट्सको २७ खेलबाट ५० अंक पुगेको छ । पराजित इम्पोली ३१ अंक जोडेर १३औं स्थानमा रहेको छ ।