काठमाडौं (हाम्रो खेलकुद)– दशक लामो खेल जीवनमा लिगमा सय खेल भनेको खासै धेरै नभएको सहिद स्मारक ए डिभिजन लिगका उत्कृष्ट गोलकिपर विशाल श्रेष्ठले बताएका छन् ।

लगातार मछिन्द्र फुटबल क्लबलाई लिग च्याम्पियन बनाउने क्रममा टोलीको पोष्ट सम्हालेका विशालले उत्कृष्ट गोलकिपर चुनिएपछि भने, ‘सय खेल भन्दा धेरै जस्तो लाग्छ । तर खासै त्यो धेरै होइन, सामान्य हो । मैले खेल्न थालेकी १०-१२ वर्ष भयो । खेल्दै जाँदा सय , दुई सय खेल हुन्छ । तर लिग नै निरन्तर भएको छैन । निरन्तर लिग भएको भए यो भन्दा धेरै हुन्थ्यो ।’

शनिबार सम्पन्न लिगको १२ औं चरणमा थ्री स्टार क्लबविरुद्ध खेल्दै विशालले लिगमा व्यक्तिगत सय खेल पूरा गरेका थिए । मछिन्द्रलाई यसपटक च्याम्पियन बनाउने क्रममा विशालले सबै खेलमा सुरुवात गरे । पहिलो र १३ औं तथा अन्तिम खेलमा समान १ गोल खाएका विशालले बाँकी ११ खेलमा भने क्लिन सिट राखेका थिए ।

उनले भने, ‘टिमले सुरुवातदेखि राम्रो खेल्यौं । अपराजित रहँदै लिग जित्यौं । त्यो ठूलो उपलब्धी हो ।’

विशालसहित मछिन्द्रका सुजल श्रेष्ठ र विशाल राईले दुई फरक क्लबबाट लगातार चौथो पटक लिग जितेका हुन् । उनले खुसी साटे, ‘दुई फरक क्लबबाट ४ पटक जित्दा खुसी छौं ।’ यसअघि उनीहरुले मनाङ मर्स्याङ्दी क्लबबाट पनि लगातार लिग उपाधि जितेका थिए ।

उनले लिगमा आफ्नो तर्फबाट सबै खेलमा उत्कृष्ट खेल्ने प्रयास गरेको जनाउँदै भने, ‘तथापी तुलानात्मक रुपमा सातदोबाटोविरुद्धको खेल राम्रो भएको थियो ।’

गोलकिपरको जीवनमा क्लिन सिटको अर्थ हुने भएपनि त्यो भन्दा ठूलो टोलीको जित महत्वपूर्ण हुने विशालले बताए । ‘क्लिन सिट भन्दा नि जित्ने रणनीति हो’, उनले भने, ‘प्रशिक्षकले जतिले पनि पहिलो गोल नखाने भन्ने गर्नुहुन्थ्यो । गोल त हामी ९० मिनेटमा जसरी गछौं भन्ने थियो । त्यहि कुरालाई लिएर खेलेका थिए ।’

यसपटक लिगमा विशालले १३ खेलमा पुरा १ हजार १ सय ७० मिनेट नै मैदानमा बिताएका थिए ।