काठमाडौं (हाम्रो खेलकुद)– सहिद स्मारक ए डिभिजन लिग च्याम्पियन मछिन्द्र फुटबल क्लबका प्रशिक्षक प्रवेश कटुवालले अपराजित रहँदै लिगको अन्त्य गर्न पाउँदा खुसी लागेको बताएका छन् ।

शनिबार अन्तिम खेलमा नेपाल एपिएफ फुटबल क्लबलाई २–१ ले हराउँदै मछिन्द्रले जितका साथ लिगको अन्त्य गरेको थियो । १३ खेल मध्ये मछिन्द्रले ११ खेलमा जित र २ मा बराबरी खेलेको थियो । सम्भव ३९ मध्ये ३५ अंक जोेडेको मछिन्द्र ११ खेलमै लिग च्याम्पियन बनेको थियो । त्यसअघि सातौं चरणको विजेताका रुपमा एएफसी कपका लागि छनोट भएको थियो ।

‘हामीले अपराजित भएर लिग टुंगाउने लक्ष्य थियो । त्यसमा पनि जितेर टुंगाएको छौं । त्यो महत्त्वपूर्ण पाटो हो’, कटुवालले लिगको अन्तिम खेलपछि भने, ‘सुरुमा सात खेल सम्म गाह्रो भएको थियो । नवौं खेलबाट सजिलो भयो । प्रतिद्वन्द्वि टोलीहरु रोकिए । यसपटक सजिलो तरिकाले लिग जितियो ।’

लगातार दोस्रो पटक उपाधि जिताएका कटुवालले थपे, ‘गत वर्ष अन्तिम सम्म कुर्नु परेको थियो । त्यसबाट धेरै सिकायो । त्यो अनुभवले यसपटक सजिलो भएको हो । गत वर्षको कमी कमजोरीलाई सुधार गर्दै यसपटक खेल्यौं । यसपटक राम्रो खेलाडी बढी अनुबन्ध गरेका थियौं । सबै खेलाडीले शतप्रतिशत दिएर अनुशासनमा बसेर खेले । त्यसकैको नतिजा हामी च्याम्पियन बनेका हौं ।’

अर्को महिना हुने एएफसी कप छनोटका लागि टोलीको तयारी लगातार रुपमै चलिरहेको कटुवालको भनाई थियो । ‘एएफसी कपको तयारी चलिरहेको छ । लिग सकेर ४ महिनापछि खेल्नुपर्ने भए गाह्रो हुन्थ्यो’, उनले भने, ‘हामी त निरन्तर खेलिरहेका छौं । हामी एएफसी कप छनोटका लागि सफल भएदेखि नै तयारी भइरहेको छ । अब मोफसलको प्रतियोगिता पनि खेल्नुपर्नेछ ।’

कटुवालले एएफसी कपका लागि टोलीलाई अझै बलियो बनाउने कोशिस गर्ने बताएका छन् । ‘एएफसीको नियमावलीले असर गर्ने हुन्छ । त्यसका आधारमा अझै बलियो टोली बनाउने कोशिस गर्नेछौं,’ उनले भने ।

चैत २२ गते दशरथ रंगशालामा मछिन्द्रले श्रीलंकाको लिग च्याम्पियन ब्लु स्टारको सामना गर्नेछ । श्रीलंकाली टोलीलाई पराजित गर्न सकेको खण्डमा अर्को चरणमा मछिन्द्रले चैत २९ गते एटिके मोहुन बगानको सामना गर्नेछ । मोहुन बगानलाई पनि हराउन सके मछिन्द्रले समूह डीमा भारतको गोकुलम केरेला, बंगलादेशको बसुन्धरा किड्स र माल्दिभ्सको माजिया स्पोर्टस् एन्ड रिक्रिएसनको सामना गर्नेछ ।