काठमाडौं (हाम्रो खेलकुद) – लिग च्याम्पियन बनिसकेको मछिन्द्र फुटबल क्लबले कतार एअरवेज सहिद स्मारक ‘ए’ डिभिजन लिगको पहिलो हाफमा विभागीय नेपाल एपिएफ फुटबल क्लबविरुद्ध अग्रता लिएको छ ।

त्रिपुरेश्वरस्थित दशरथ रंगशालामा शनिबार भएको खेलको पहिलो हाफमा अभिषेक गुरुङको गोलमा मछिन्द्रले १–० को अग्रता लिन सफल भएको हो । उनले ४२औं मिनेटमा गोल गरेका थिए ।

त्यसअघि खेलको छैटौं मिनेटमा अभिषेक गुरुङको प्रहारलाई एपिएफका गोलरक्षक युया कुरियामा बचाउँदा मछिन्द्र अग्रता लिनबाट चुक्यो ।
११औं मिनेटमा विकी तामाङको क्रसमा आशिष लामाको प्रयासलाई गोलरक्षक विशाल श्रेष्ठले बचाए । २२औं मिनेटमा आवास लामिछानेले सुवर्ण अवसर पाएपनि उनको पेनाल्टी बक्सभित्रको प्रहार फितलो बन्यो ।

३६औं मिनेटमा कप्तान नविन लामाको क्रसमा राजन गुरुङको हेडरलाई गोलरक्षक विशालले सहजै बचाए । ३८औं मिनेटमा प्रदीप लामाको क्रसमा आशिष लामाले बक्सभित्र सुनौलो मौका चुकाउँदा एपिएफ अग्रता लिनबाट चुक्यो । ४०औं मिनेटमा विमल घर्तीमगरको पासमा अभिषेक रिजालको प्रहार पोस्टबाट थोरै आकासियो ।

४२औं मिनेटमा अभिषेक गुरुङले गोल गर्दै मछिन्द्रलाई सुरुवाती अग्रता दिलाए । आन्द्रेस नियाको पासमा उनले गोलरक्षक युया अघि बढेको अवस्थामा खाली पोस्टमा गोल गरे ।

मछिन्द्र अपराजित रहँदै लिग च्याम्पियन बन्ने लक्ष्यमा हुनेछ । एपिएफ मछिन्द्रको अपराजित यात्रा पूर्णविराम लगाउने योजनामा रहेको छ ।लगतार दोस्रो सिजनको लिग च्याम्पियन बन्ने क्रममा मछिन्द्रले लिगको दुई खेल बाँकी छँदै उपाधि पक्का गरेको थियो । एपिएफले सुरुवातमा रेलिगेसन जोनमा संघर्ष गरेपनि पछि लगातार उच्च प्रदर्शन गर्दै रेलिगेसन जोगाएको थियो ।