काठमाडौं (हाम्रो खेलकुद)– न्यूरोड टिम (एनआरटी) ले तेस्रो स्थानमा रहँदै सहिद स्मारक ए डिभिजन लिगको अन्त्य गरेको छ । अन्तिम दिन शनिबार सातदोबाटोस्थित एन्फा कम्प्लेक्समा नेपाल पुलिस क्लबलाई ३–१ ले हराउँदै एनआरटीले तेस्रो स्थान पक्का गरेको हो ।

१३ औं चरणको समाप्तीमा आर्मी र एनआरटीले समान २३ अंक जोडेका थिए । आर्मीले दशरथ रंगशालामा मनाङसँग १–१ को बराबरी खेल्दै दोस्रो स्थान पक्का गरेको हो । एनआरटी तेस्रो स्थानमा रह्यो । हेड टु हेडका आधारमा आर्मी दोस्रो र एनआरटी तेस्रो भएको हो । २१ अंक जोडेको सातदोबाटो युथ क्लब चौथो र २१ मनाङ पाँचौं स्थानमा रहेको छ ।

एनआरटीका लागि मेसुके ओलुमोउले ह्याट्रिक गरेका थिए । पुलिसका लागि रवि पासवानले गोल गरेका थिए । खेलमा अग्रता भने पुलिसले लिएको थियो । १२ औं मिनेटमा रवि पासवानको गोलमा पुलिसले अग्रता बनाएको थियो ।

दोस्रो हाफको सुरुवातमै गोल गर्दै एनआरटी खेलमा फर्किएको थियो । मेसुकेले ४७ औं मिनेटमा बराबरी गोल फर्काएका थिए । मेसुकेले नै अर्को गोल ६२ औं मिनेटमा गरेका थिए । मेसुकेले ८३ औं मिनेटमा अर्को गोल गर्दै ह्याट्रिक पूरा गरेका थिए । यो लिगमा ह्याट्रिक गर्ने उनी तेस्रो खेलाडी बने । यसअघि सातदोबाटोका अजायी माट्रिन्स र मनाङका ओलावाले अफिजले ह्याट्रिक गरेका थिए ।