काठमाडौं (हाम्रो खेलकुद)– त्रिभुवन आर्मी फुटबल क्लबले पनि लगातार दोस्रो पटक दोस्रो स्थानमा रहँदै सहिद स्मारक ए डिभिजन लिगको अन्त्य गरेको छ । लिगको अन्तिम दिन शनिबार दशरथ रंगशालामा मनाङ मस्र्याङ्दी क्लबसँग १–१ को बराबरी खेल्दै आर्मीले दोस्रो स्थान पक्का गरेको हो । यसअघि २०७६ मा भएको लिगमा पनि आर्मी दोस्रो भएको थियो ।

१३ खेलको समाप्तीमा आर्मीले २३ अंक जोड्दै दोस्रो स्थान पक्का गरेको हो । न्यू रोड टिम एनआरटीले पनि शनिबार अर्को खेलमा नेपाल पुलिस क्लबलाई २–१ ले हराउँदै आर्मीसँग समान २३ अंक बनाएको थियो । तर हेड टु हेडका आधारमा आर्मी दोस्रो र एनआरटी तेस्रो भएको हो । २१ अंक जोडेको सातदोबाटो युथ क्लब चौथो र २१ मनाङ पाँचौं स्थानमा रहेको छ ।

दोस्रो हाफमा आत्मघाती गोलबाट आर्मीले खेलमा बराबरी गरेको थियो । ७६ औं मिनेटमा सन्तोष तामाङलेको फ्रिकिकमा फ्रयान्कलिन र अशोक बराल ठोक्किदा उनीहरुलाई लागेर बल आत्मघाती गोल भएको थियो । त्यसअघि मनाङले कप्तान अन्जन विष्टको गोलमा अग्रता लिएको थियो । पुजन उपरकोटीको कर्नरमा दीनेश राजवंशीले हेड गरेको बललाई आर्मीका गोलकिपर विकेश कुथुले पन्च गरे त्यहि रिबाउन्डमा अन्जनले नजिकबाट गोल गरेका थिए ।

लिगमा अपराजित दुई टोली मध्येको एक आर्मीले १३ मध्ये ५ खेलमा जित र ८ खेलमा बराबरी गरेको थियो । यो लिगमा आर्मी सबै भन्दा बढी बराबरी खेल्ने टोली हो । मछिन्द्र फुटबल क्लबले ११ औं चरणमा नै लिग जितेको थियो । १२ खेल सम्म अपराजित रहेको मछिन्द्रले आज हुने लिगको अन्तिम खेलमा एपिएफ फुटबल क्लबको सामना गर्नेछ ।