एजेन्सी – शीर्षस्थानको एसी मिलान बराबरीमा रोकिएको दिन दोस्रो स्थानमा रहेको इन्टर मिलान पनि इटालियन सिरी ‘ए’ मा बराबरीमा रोकिएको छ ।

जेनोभामा शुक्रबार राति भएको खेलमा इन्टर मिलान घरेलु टोली रेलिगेसन जोनको जिनोआसँग निराशजनक गोलरहित बराबरीमा रोकिएको हो । यो बराबरीसँगै इन्टरले शीर्षस्थानमा उक्लने अवसर गुमाएको छ । घरेलु टोलीलाई लगातार दवावमा राखेपनि इन्टर मिलानले गोल गर्न नसक्दा बराबरीमा रोकिन बाध्य बन्यो ।

सातौ मिनेटमा हकान चलहानोग्लुको प्रहार पोस्ट नजिकैबाट बाहिरियो । २८औं मिनेटमा मेलोगोनीको प्रहारलाई इन्टरका गोलरक्षक समिर हान्डानोभिकले दोस्रो प्रयासमा मुस्किलले बचाए । ६२औं मिनेटमा हकान चलहानोग्लुको कर्नरमा ड्यानियल डि एम्ब्रुसोको हेडर क्रसबार र गोलरक्षक साल्भाटोर सिरिगुलाई लागेर फर्कदा इन्टर अग्रता लिनबाट चुक्यो ।

७९औं मिनेटमा लोउटारो मार्टिनेजको प्रहरमा गोलक्षक सिरिगु नै बाधक बन्दा इन्टरले अग्रता लिन सकेन । लगत्तै ८०औं मिनेटमा निकोला बरेल्लाको भली प्रहारले पोस्टको दिशा लिन नसक्दा खेल बराबरीमा सकियो ।

यो बराबरीसँगै महत्वपुर्ण अंक गुमाएको इन्टरले शीर्षस्थानमा उक्लने मौकासमेत गुमाएको छ । यद्दपि टोलीले शीर्षस्थानको एसी मिलानले भन्दा एक खेल कम खेलेको छ । इन्टर २६ खेलबाट ५५ अंक जोडेर दोस्रो स्थानमा रहँदा शीर्षस्थानको मिलानसँग २ अंकले पछि छ ।

यो सिजन १ मात्र जित निकालेको जिनोआको यो १४औं बराबरी हो । १२ हार बेहोरेर रेलिगेसन जोनमा रहेको जिनोआ २७ खेलबाट १७ अंक जोडेर १९औं स्थानमा रहेको छ ।