काठमाडौं (हाम्रो खेलकुद) – इन्ज्युरी समयको थप गरिएको अन्तिम मिटेमा मिडफिल्डर डोना थापाको गोलमा रुस्लान थ्री स्टार क्लब कतार एअरवेज सहिद स्मारक ‘ए’ डिभिजन लिगको अन्तिम खेलमा रेलिगेसनमा परिसकेको ब्रिगेड ब्वाइज क्लब (बिबिसी) सँगको हारबाट जोगिएको छ ।

थ्री स्टारले बिबिसीसँग १–१ गोलको बराबरी खेलेको हो । सातदोबाटोस्थित एन्फा कम्प्लेक्सको खेल मैदानमा शुक्रबार भएको खेलमा बिबिसीका प्रशान्त तामाङले गोल गर्दा थ्री स्टारका डोना थापाले बराबरी गोल फर्काए । दुवै गोल दोस्रो हाफमा भएको थियो ।

५६औं मिनेटमा प्रशान्त तामाङले गोल गर्दै बिबिसीलाई सुरुवाती अग्रता दिलाए । गोलरक्षक एन्जल श्रेष्ठले रिलिज गरेको बलमा थ्री स्टारका कप्तान अशोक खवास र राफयल रिम झुक्किन पुग्दा प्रशान्तले बल अघि बढाउँदै वान भर्सेस वानको अवस्थामा दोस्रो बार च्याप्दै गोल गर्न सफल भएका थिए ।

इन्ज्युरी समयको थप गरिएको छैटौं मिनेटमा डोना थापाले गोल गर्दै थ्री स्टारलाई हारबाट जोगाए । उनले अन्सुमाना क्रोमाहको पासमा वान टचमा फिनिस गरेका थिए । बराबरीसँगै थ्री स्टारले लिगमा १३ खेलबाट १९ अंक जोडेर छैटौं स्थानमा लिगको अन्त्य गरेको छ ।

बिबिसी १३ खेलबाट ७ अंक जोडेर १३औं स्थानमा रह्यो । रेलिगेसनमा पर्दा बिबिसीको यो सबैभन्दा कम अंक तथा थ्री स्टार लिग इतिहासमा पहिलोपटक शीर्ष चारमा पर्न सकेन ।