एजेन्सी – युइएफए च्याम्पियन्स लिगको समूह चरणबाटै बाहिरिएको जर्मन क्लब बोरुसिया डर्टमुन्ड युरोपा लिगबाट पनि बाहिरिएको छ । अन्तिम ३२ को प्ले अफ खेलमा स्कटिस क्लब रेन्जर्ससँग समग्रमा ६–४ ले पराजित हुँदै डर्टमुन्ड युरोपा लिगबाट पनि बाहिरिएको हो ।

पहिलो लेगमा ४–२ को हार बेहोरेको डर्टमुन्डले दोस्रो लेगमा २–२ गोलको बराबरी खेलेपनि पहिलो लेगको हारले अघिल्लो चरणमा पुग्न सकेन ।आइब्रक्स स्टेडियम ग्लास्गोमा बिहीबार राति भएको खेलमा घरेलु टोली रेन्जर्सका लागि दुवै गोल जेम्स टाभेरनिएरले गोल गर्दा डर्टमुन्डका जुडे बेलिङघम र डोनेल मालेनले गोल गरे ।

खेलको २२औं मिनेटमा जेम्स टाभेरनिएरले पेनाल्टीमा गोल गर्दै घरेलु टोली रेन्जर्सलाई १–० को अग्रता दिलाए । ३१औं मिनेटमा जुडे बेलिङघमले गोल गर्दै खेललाई १–१ गोलको बराबरीमा ल्याए । ४२औं मिनेटमा डोनेल मालेनले गोल गरेपछि डर्टमुन्डले पहिलो हाफमा २–१ को अग्रता लिदै युरोपा लिगको सम्भावना राखेको थियो ।

तर, ५७औं मिनेटमा जेम्स टाभेरनिएरले गोल गरेपछि खेल २–२ गोलको बराबरीमा पुग्यो । त्यसपछि तप गोल निस्कन नसक्दा खेल बराबरीमा सकिदा डर्टमुन्ड अघिल्लो चरणमा प्रवेश गर्न सकेन ।

अन्य नतिजा

डिनामो जाग्रिवविरुद्ध सेभिया (१–०) समग्रमा (२–३), लाजियोविरुद्ध पोर्टाे (२–२) समग्रमा (३–४), ओलम्पियाकोसविरुद्ध एटलान्टा (०–३) समग्रमा (१–५), रियल सोसिडाडविरुद्ध आरबी लाइप्जिग (१–३) समग्रमा (३–५), ब्रागाविरुद्ध एफसी सेरिफ (२–०) पेनाल्टी र रियल बेटिसविरुद्ध जेनिथ (०–०) समग्रमा (३–२)